O mlikarici

Gluho j' doba noći, okol tri ure je. Si još spu i slatko sanju, a ja se moran stat. A rada bin još malo pospala, kušin je mehak, posteja tepla... Na, ča ćeš... Na se stavjan fris, kotulu, berhan, tarves... Okol hrta ogrnjan vuneni šijal. Mrzlo je, trebe oganj snetit. Hmalu se z ognjišća čuje kako plamik tanca. Livan frišku vodu va kotlić da se stepli na ognjišću. Leh da skuhan bilo kafe za dicu, za južinu kad se stanu. Majkica će potla palentu konpiricu skuhat. 
Ziman jenu trišćicu z ognja za važgat feralić na petroju. Moran poć va štalu, kravu pomust. Škuro j' vane kot va rake. Moja kravica već zna da njoj dohajan kot i sako jutro. Malopomalo natekal j' pun sić teplega bilega mlika. Bit će za čagod zaslužit. A onput nazad va kuću. Mliko ću va late prelit. Dil mlika ću spravit va stran, za škorup tepat i sir delat. Parićujen sir kega san čera storila. I putar... Spravjan se va plašćenicu, za oprtit. 

Va debeleh kopicah i postoleh na nogah, z facolon na glave, z feralićon va jene i velun latun va druge ruke, z teškun plašćenicun na pleći, gren vanka, va škurinu. 
Tako oprćena zapiran vrata i obrnjan se naprvo, kot i sagdan. Leh tamo na pute sviti feral od susede Vidice. I mića Marica j' šnjun, oprćena z košićon drv. A brižan otrok, za videt je da njoj se još spi... Divojčica j' to od komać deset let. Spametin se da san i ja jušto tako, va teh leti prvi put košić oprtila i skupa z materun i mlikaricami šla zdolun. Teško j' bilo to brime, ma moralo se j' poć matere pomoć. Majkica se j' neboga razbolela od tulikeh leti zdolun i zgorun oprćena hodit, trudna j' bila od sega. 
A onput, par let za ten... kad je mat moja rodila najmlajega brata, nesla je na Ričinu košaru robe zipirat. Ni njoj bil ki napomoć. Suseda nju j' našla ležat kraj vodi, kraj košare, mrtvu... Odonda j' se na mane zustalo i na mlajoj sestrice. Ja san plašćenicu materinu oprtila, a sestrica moj košić. Puno puti mi mat moja pokojna va sanje dojde, pak mi se osmehuje i po laseh me miluje aš zna kuliko san se natrudila sestre i braću prihranit i zgojit, va škole jih otpravit, poženit. Jenega j' brata barba, ki j' plovan va našoj crekve, zel za popa ziučit. Najmlaja j' sestrica potla za koludricu šla. Ostali smo nas pet va kuće, z ocon i starun majkicun, ma majkičine noge nisu više mogle tuliko brime zdolun, v Riku nosit. I otac je vaje za materun šal.

Ni to živjenje lahko, ma jušto uža bit i fanj veselo. Tako će, bireć, i danaska bit, aš je čera va Ifkinen sele lipi kažin bil! Čera j' Pepić h Tonice prišal potajno ofirat, ma njh je njeja majkica ćapala da se va sene bušuju...zajeno ga je, na su forcu zijajuć, pu plovana spovede potirala, kistemu je do pred par let otpivač bil! Ki zna ča mu je onisti rekal. Ma ćemo i to doznat, ni Gromišćina tuliko vela! Brižna j' Tonica potla na Ričinu šla z košarun lancuni, a za njun njurgajuć stara majkica, za stražu držat. Se ćemo sad čut aš pred nami j' Rebra, a Jelka, Ifka i Nada jušto prihajaju od svojga sela. Grd je i strman put po Rebri, pa ga j' lagje pasat ćakulajuć i na smeh obrnjujuć z kumpanijun.

I tako ćakula na ćakulu, zdanilo se j', a pred nami su Banska vrata. Tu ćemo se razdilit. Ifka, Vidica i mića Marica gredu zgorun na Trsat prodavat, a Nada, Jelka i ja gremo zdolun naprvo, v Riku. Pred nami, a i zada nas, pomalo hode i druge mlikarice, va kumpanije po par od njih, kako s ke strani Gromišćine. Doli, va grade ćemo trefit Halubajke, ča od Klane i Studene, Marčeji i Svetega Mateja mliko donašaju. Ma halubajske mlikarice većma po Kastve i Volosken obahajaju, njin je ta stran naredneja.

Skudagod smo i kamogod gremo, sako jutro friško mliko nosimo, po kućah gospockeh obahajamo. Si poznaju nas mlikarice.

"Gospa, zamite friškega mlika!"

Oprćene, pogrbjene pod tešken brimenon. Po vrelen sunce, po dažju al snegu, po teplemu, po mrzlemu, škinu prigibjemo noseć mliko, tu bilu Božju kapju ča j' nan decu othranila, i našu i gracku, i va život jih otpravila.