O mlikarici

Gluho j' doba noći, okol tri ure je. Si još spu i slatko sanju, a ja se moran stat. A rada bin još malo pospala, kušin je mehak, posteja tepla... Na, ča ćeš... Na se stavjan fris, kotulu, berhan, tarves... Okol hrta ogrnjan vuneni šijal. Mrzlo je, trebe oganj snetit. Hmalu se z ognjišća čuje kako plamik tanca. Livan frišku vodu va kotlić da se stepli na ognjišću. Leh da skuhan bilo kafe za dicu, za južinu kad se stanu. Majkica će potla palentu konpiricu skuhat. 
Ziman jenu trišćicu z ognja za važgat feralić na petroju. Moran poć va štalu, kravu pomust. Škuro j' vane kot va rake. Moja kravica već zna da njoj dohajan kot i sako jutro. Malopomalo natekal j' pun sić teplega bilega mlika. Bit će za čagod zaslužit. A onput nazad va kuću. Mliko ću va late prelit. Dil mlika ću spravit va stran, za škorup tepat i sir delat. Parićujen sir kega san čera storila. I putar... Spravjan se va plašćenicu, za oprtit. 

Va debeleh kopicah i postoleh na nogah, z facolon na glave, z feralićon va jene i velun latun va druge ruke, z teškun plašćenicun na pleći, gren vanka, va škurinu. 
Tako oprćena zapiran vrata i obrnjan se naprvo, kot i sagdan. Leh tamo na pute sviti feral od susede Vidice. I mića Marica j' šnjun, oprćena z košićon drv. A brižan otrok, za videt je da njoj se još spi... Divojčica j' to od komać deset let. Spametin se da san i ja jušto tako, va teh leti prvi put košić oprtila i skupa z materun i mlikaricami šla zdolun. Teško j' bilo to brime, ma moralo se j' poć matere pomoć. Majkica se j' neboga razbolela od tulikeh leti zdolun i zgorun oprćena hodit, trudna j' bila od sega. 
A onput, par let za ten... kad je mat moja rodila najmlajega brata, nesla je na Ričinu košaru robe zipirat. Ni njoj bil ki napomoć. Suseda nju j' našla ležat kraj vodi, kraj košare, mrtvu... Odonda j' se na mane zustalo i na mlajoj sestrice. Ja san plašćenicu materinu oprtila, a sestrica moj košić. Puno puti mi mat moja pokojna va sanje dojde, pak mi se osmehuje i po laseh me miluje aš zna kuliko san se natrudila sestre i braću prihranit i zgojit, va škole jih otpravit, poženit. Jenega j' brata barba, ki j' plovan va našoj crekve, zel za popa ziučit. Najmlaja j' sestrica potla za koludricu šla. Ostali smo nas pet va kuće, z ocon i starun majkicun, ma majkičine noge nisu više mogle tuliko brime zdolun, v Riku nosit. I otac je vaje za materun šal.

Ni to živjenje lahko, ma jušto uža bit i fanj veselo. Tako će, bireć, i danaska bit, aš je čera va Ifkinen sele lipi kažin bil! Čera j' Pepić h Tonice prišal potajno ofirat, ma njh je njeja majkica ćapala da se va sene bušuju...zajeno ga je, na su forcu zijajuć, pu plovana spovede potirala, kistemu je do pred par let otpivač bil! Ki zna ča mu je onisti rekal. Ma ćemo i to doznat, ni Gromišćina tuliko vela! Brižna j' Tonica potla na Ričinu šla z košarun lancuni, a za njun njurgajuć stara majkica, za stražu držat. Se ćemo sad čut aš pred nami j' Rebra, a Jelka, Ifka i Nada jušto prihajaju od svojga sela. Grd je i strman put po Rebri, pa ga j' lagje pasat ćakulajuć i na smeh obrnjujuć z kumpanijun.

I tako ćakula na ćakulu, zdanilo se j', a pred nami su Banska vrata. Tu ćemo se razdilit. Ifka, Vidica i mića Marica gredu zgorun na Trsat prodavat, a Nada, Jelka i ja gremo zdolun naprvo, v Riku. Pred nami, a i zada nas, pomalo hode i druge mlikarice, va kumpanije po par od njih, kako s ke strani Gromišćine. Doli, va grade ćemo trefit Halubajke, ča od Klane i Studene, Marčeji i Svetega Mateja mliko donašaju. Ma halubajske mlikarice većma po Kastve i Volosken obahajaju, njin je ta stran naredneja.

Skudagod smo i kamogod gremo, sako jutro friško mliko nosimo, po kućah gospockeh obahajamo. Si poznaju nas mlikarice.

"Gospa, zamite friškega mlika!"

Oprćene, pogrbjene pod tešken brimenon. Po vrelen sunce, po dažju al snegu, po teplemu, po mrzlemu, škinu prigibjemo noseć mliko, tu bilu Božju kapju ča j' nan decu othranila, i našu i gracku, i va život jih otpravila.

Kafe

Ča j' to va ten kafu da ga smiron pijemo?
Opreš oče rano jutro, kot pijana se po kuće motaš dok ne popiješ prvo kafe. Pa greš na delo ako si te sreće da još negder delaš i prvo delo ko je za obavit je - popit kafe. Pa ti dojde vreme za marendu, a ti po žepeh išćeš munidu za kafe z onega aparata, va kantune pul kundota na kraj šalice. To ti j' kraj kundota zato da zajno greš odbavit i ono drugo na ča te to kafe potira. Aš za drugo ni. Ma zove se kafe, pa ga samo zato i piješ. Potla ti pride kakov poslovni partner, pa ala daj, popiješ još jeno kafe za kumpaniju. Onda greš doma na obed, i čin progutaš zadnji pirun jila, još se ni otrla nisi, već pitaš
-Ča ćemo sad kafe, al malo kašneje?
Ako j' to kašneje, komać ga dočekaš. Pol ure za ten, neki ti zvoni na vrata. Suseda. Al mat. Al sekrva. I se posede jušto na tvoje mesto, parićana za ćakulu (a tista usta ne ume zapret) i već pogjedeva po kuće za videt ako j kafe gotovo. A vlih si ga popila! I sad moraš opeta š njun, aš ako ne daš, povedat će okole da nisi otela š njun ni kafe popit... A još bi otela i kakov keksić da njoj kafe ne pade teško va štumik, da njoj kiselinu ne stori... Najboje da njoj zajno i šodu parićaš. Za ne-daj-boh žgaravice. Aš će ionako ki ta čas o boli počet napovedat. I tako uru vrimena. Morda i više.

A serija ti na televizje jušto počinje, a ona se još ganula ni s tvojga mesta. I nervoz te već ćapeva, ma ni siguro je od te lajave babe, al od tulikega kafa.
Fala Bogu dragemu i Majke Božje i sen sveten, rekla j da mora doma poć aš da j već posema škuro, i da će njoj Pepić zijat da kade boga je do te dobe aš je lačan i ne zna ča bi za večeru! Ja, ma sad i serija jušto finjeva i nisi videla ako j Hurem kega potrovala, ni ča je Zumbul-aga onoj kaške rekal, a ni onega lepega tića Bali-begića nisi arivala pošpijat...
-Drugi put reš ti vrata otpirat! I reči da me ni i da san šla na kafe! - zazijaš onemu svojmu ča se smeje aš konačno je mogal fuzbal gjedat namesto onistega Turka... I partiš posvema jadna va kuhinju črepi pomit da ne zustanu za jutra. I to još na ruke moraš pomivat, aš još nimaš onu makinu za črepi kot saka moderna ženska ka ovu dobu ima nogi zdignjene na kauč i gjeda televizju. I to pronjurgaš onako kot za sebe, ma opeta jušto kuliko rabi na glas da te on čuje, da ne pozabi, telac jedan. Mogal je i on to storit...
Tako. Pomila si, letriku pogasila va kuhinje i greš sest na kauč, kad va ti čas on pita, onako se z upitnikimi okol glavine
-A ča mi nećemo niš danas večerat? Ma ja san sejno nekako lačan...
I zajno ti se si bogi i se zvezde kuliko jih je na nebe i meseci i cela rodbina skupa š njimi, najdu na vrh zajika dok kramaš z vratimi od kupatila.
-Hod si sam storit! Hod mater ženit! Tr ti j storila dve ruki, nisi pobogu invalid da ne moreš ni večeru sam zet!
-Ti si zasprave ponemela! San ti lepo rekal, ne pij tuliko kafa, aš ti nervoz dela! Sad nećeš celu noć spat!

Kad štriga zustane va iste kamare kade je i televizja...

Ma pravo ću ti reć, jušto mi se danas ni otelo poć dole va moj kantun delat ti vrajži pedeve. Pa san zustala gore. Na stole va kuhinje san se karte rastegnula, važgala kompić, i ... a san, tu i tamo san ča i delala, ni da nisan... A televizja je važgana cel božji dan. Malo je Jube sedel pred njun, pa malo deca, pa je malo sama za se delala, pa san i ja malo hitila oko...
Najprvo je Ivica skijal slalom. Ja san jušto tu dobu kafe parićevala, ono prvo, do obeda. Ive je šal peti zdolun, ma ja baš i nisan jako abadala. Jušto san vase mislela kega klinca taj Ive više dela monade od sebe na temi skijami, tr već fanj vremena j' za videt da ni to više to, ni više onaj pravi. I da bi se zasprave trebal pustit tega i dat kemu mlajemu mesta... Ma znaš ča... nisan ni finila to mislet, kad je Jube onako znervirano zazijal tamo s kauča (on ti ne govori po domaći, magar se razume ča povedamo):
-Uh! Ode! Pa jebate, vidi ga, ipak ide do kraja!
-Ča se to vrnul nazada? - obrnula san se videt ča je.
-Al nema šaaanse da uopće uđe u drugu...
-A ča ja govorin celo vreme?! Ni to više za njega!
-Pa da, šta on forsira, meni zbilja nije jasno... I taj stari njegov... ma ako je on idiot, al jebate, nakon toliko operacija nema on šta više tu tražit.
-A gre Natko danas? Ki broj on ima?
-Ma neki visoki, teško će se probit, al ko zna, vidiš kako je jučer super uspio.
-Na ti cukar... makni to va stran da kafe stavin...
I tako mi pijemo to kafe i gjedamo skijanje. Sad već ni tuliki gušt, ma sejno, mane j' gušt samo ti sneg videt... Kad je šal Beni Raich zdolun, isto san rekla da bi i on mogal komotno finit to delo, a bome i Ted Ligety je šal fuć.
-Zač se Ivica opće zajebava više z ten? Ča ni mogal kot sestra mu, lepo dok je bil na vrhe, finit i cel svet bi ga zapametil kot jenega odličnega skijaša? Ovako, samo će poć se niže, još malo pa će se judi počet smet ž njega aš ne ume finit kad je vreme... i njih par isto tako. Tr je dece i mladeh...

Tako j' pasalo dopolne, skuhala san obed za prsti polizat, pojili smo i potla šli saki na svoju stran. Jube j' šal z kumpanijun na kafe, roker je šal čitat lektiru, zvrk pod tuš, a ja san se opeta pedeveja ćapala... Na stole va kuhinje. A televizja j' delala i delala.
Neku dobu hvečeri (opće nisan znala ka ura je, magar mi piše na kompiću) doletel je Jube na vrata vas zapuhan
-Jel počelo?
-Ča j' počelo? Kade?
-Pa rukomet! Zato sam i jurio doma!
-Bo! Mane j' Kockica važgana aš je bil onaj crtani, on frančeski, o telu...
-Jebli te Francuzi, protiv njih i igramo... - i zima daljinski v ruku za obrnut program, pa se šal zut i sprotu curat.
-Na, jušto ti počinje, himnu sviraju! - zijan ja za njin.
-Jel ima šta za večerat?
-Od obeda j' malo tamo na špargetu, ako ćeš si steplit...
-Ma ne da mi se to - i otpira frižider - paštetu ću si namazat.
I tako j' počela utakmica. Ja san delala svoje delo, ma sejno gluha nisan. Malo po malo me j' počel nervoz ćapevat, a oko bi sako tuliko pobeglo prama one vrajže televizje. Samo san trdo mučala i zajik grizla da Jube ne opazi. Da me pasa nervoz, odigrala san dve-tri runde karti na kompiću. Bome san i celu jenu cikuladu pojila. I tako j' finilo prvo poluvreme. Jušto da čovek gre curat, ča popit, ćapat zraka vane pred vrateh - oni gnjusni daž opeta pada! Pa to j' za ponemet!
I evo ti već drugo poluvreme. I ča reć? Naši ko da dve leve imaju, muče se oko oneh Frančezi, suci se malo delaju bedasti... i to je to. Dobro, ala, protu kraja su se malo refali, lih da bi bilo gol zabit i zjednačit, ma j' vranić i tu loptu zel... Zafikal je kraj, a naši su zgubili dva razlike. Jube ni niš govoril, ma j' sejno nekako grdo pogjedeval prama mane. Ja san glavu prignula va karte i storila fintu da san va veleeeeen delu. A cel svet zna da ja ne smen tu bit. Va iste prostorije kade se kakova utakmica gjeda. Va iste kuće kade se kakova utakmica gjeda. Ma ni čut ne smen da j' opće kakova utakmica! Aš onda to ni dobro. Aš se zaštrigan. A ako već moran bit tu, ni pod razno ne smen za naši navijat. Leh za oni drugi, da njih zaštrigan, pa da oni zgube. Ja, navijala bin ja morda za Frančezi, ma baš nisan otela aš mi oni karonja od Karabatića baš niš ni simpatičan. Fulirant obični. Balkanac kako god obrneš. Glumac. Vrah ga zel! Da ni on igral, morda bin i navijala za Frančezi, aš je prvo bil Taxi na televizje, pa san se lepo nasmela - Frančezi delaju jako dobri filmi. Pa su mi onda si Frančezi smešni i simpatični. Leh ako nisu Frančezi... Ja, ni danas bil neki dobar dan za naši sportaši, a još je i dažjeno.
Ma gren ja taj pedeve finit... Na, i opeta j' nekakov frančeski film na televizje!

Kapuz kiseli z domaćemi kumbasici i vinon, z peknjice

Prišal je h Matujan voz kapuza,

voz kapuza kiselega 

Joj, joj, joj konpir i fažol 

slana riba i palenta - to je se dobro!

Za 4 peršone van rabi:

Pol kila kiselega kapuza 

4 pari kumbasic 

4 česni česna 

1 žlica dobre prašće masti 

par listi javorike  

popar va zrne 

žmuj (1,5 dl) belega vina (kastafske Belice) 

po voje soli al malo Vegete (ne preveć, aš su i kapuz i kumbasice slani)

Steplite peknjicu na 220°C.

Široku suru (bi bilo boje ako je zemjana, ma i saka druga će bit dobra) pomažite z mastun. Na to rastresite kiseli kapuz, sakuda jednako.

Česan olupite i prerežite napol, pa zarivajte va kapuz na par mesti. Hitite i par zrni popra i par opraneh listi javorike.

Odzgor kapuza stavite dobre domaće kumbasice, po dugen zrežene napol.

Se skupa zalejte z belen vinon.

Pokrijte z aluminijskun foljun, na ke štikadenton prošupite par škujic da more sapa hodit vanka. Pečite jeno pol ure, pa znamite folju i pečite još kvarat ure, al malićo manje, da se odzgor lepo zapeče.

Obed po domaću je parićan. Hten skuhajte palentu, običnu al konpiricu, a morete za gušt odzgor zribat i trdega ovčega sira. I ne pozabite na žmuj vina da jilo lagje gre zdolun!

A potla obeda, nemojte zajeno zaspat, morete malo i zatancat da se one prokjete štrige od kalorij preveć ne ćapaju!

Homo frigat fritule!

Te miće, slatke balice si rada pojimo!
Fanj let nazad, ovi današnji kolači se nisu užali delat za sagdan, a i nekako su se delali najveć po grade, ne po seleh. Ma fritulice, al ulenjaki kako jih još tu pul nas zovu, bile su slatko i za sagdan i za blagdan i va grade i po seleh. Mepar, da ni ženske ka ih ne ume storit,  ni domaće, a ni prišlice. A moru se storit na fanj modi, more se va njih sačesa nadrobit. Ma mane su najboje po oven ricete:

• 40 deki muke
• 1 jušna žlica pecilnega praha
• 10 deki cukara
• 1 mića žličica soli
• 1 lemuncin
• 2 deci jogurta
• 35 deki jabuk
• 3 jaja
• pol deca rakije

Htemu van još rabi uje za friganje i cukar va prahu za dobro posipat po fritulah. Ako volite, va testo morete zmešat i malo cizib.

Va muku zmešajte pecilni prah i sol. Zribajte i ocedite lemuncin, pa to zmešajte z jogurton i rakijun. Ostržite i zribajte jabuki.

Jaja dobro stucite s cukaron. Va to zmešajte zribane jabuki i jogurt rakijun i lemuncinon. Po malo nutra mešajte i muku. Gotovo testo bi trebe bit lepo glatko, ne preveć trdo, da se more lepo z manjun žlicun znimat i stavjat va vrelo uje. Frigajte jih do lepega zlatnega kolora, pa jih onda znamite vanka na kakovu krpu (nemojte onu blatnu od črepi, leh čistu!) da se uje ocedi, pa komać onda stavite va terinicu ili na pijat i posipajte fanj cukara va prahe po njimi.

Najboje za jist su još mjačne i vele kot malo veći oreh.

Još sličic:

Kroniki od Pusta - Antonja na Kvarnere

Od čera, od Antonje 17. jenara, pu nas na Kvarnere j' počelo, kako to užaju reć - peto godišnje doba. Doba od nemotariji, huncutariji i sekakoveh monadi. Doba od maškar. Pusno doba. No, ako ćemo jušto, počelo je još na Tri Kraji, ma čera, kad je zatulil rog, i zadnje selo kisto još ni ćapalo virus od munjesanja, i službeno j' "palo".
Ovega leta Antonja j' bila kot da se j' nebo zemjun sestavilo. Daž je kot s kabla leval cel božji dan. Jušto dan za niš. Pak san se spametila, kad san po sen ten dažju, hvečeri, po ceste čula mužiku od maškar, ča gredu zgorun va Sveti Matej Pusta obesit na pal, kako j' to bilo leta 2011. kad san još na Trampoven Brege bivala... no čujte, ću van povedet!

...Na mojen šufite čula se mužika od seh stran – zdola mane tulili su i sopli su Zamećani, na leve Pehinari, na desne Kastafci, a zada mane Halubajci... Tulilo je i soplo i po Kvarnere od Crikvenice i Bribira preko Krasice i Hreljina, i po Liburnije - po Matujah, Opatije, Lovrane...
Čera, na Antonju, sen je načelnikon i gradonačelnikon zaškurilo pred očimi aš su morali abdicirat, pustit svoje mehke foteji va ken se rit lepo ćuti, i predat kjuči od mesta maškarsken vlastodršcen. Tako j' bilo i pul nas na svetomatejsken Brege, kot i sako leto. Ma ov put, za pravo čudo Božje, ni dažjilo! Meštar Pinel je dobil kjuči. Proglasili su ki j' kriv za se grdo ča nas je našlo pasanega leta - Pust, zna se! Pa su ga neboga, obesili na pal. I tako će bit obešen skrozi do osmega marača... Zajeno se j', kot i va sake revolucije, poništilo se regule od stareh vlasti i proglasilo svoje. A one van, dragi moji, ovako gredu:

DELAT SE NE SME, SKRBET NIŠ, POJIDAT SE NIKAKO, JADIT SE – ZABRANJENO. MORA SE: LUMPAT, POHAJAT, TANCAT, ZABAVJAT I LIH MISLET KAKO ČIN VEĆU BEDASTOĆU ZAKUHAT I DOBRO SE ZABAVIT.

A bogme, ni ni ten noven vlastodršcen hudo - meštar od maškar mora nagjedat se nemotarije i cel taj šušur, mora pit i jist kuliko god mu va drobac stane, pa i malo više (kot i dosadajni načelniki), mora tancat i hopsat, a brižan, mora i sako leto novu, mladu, šesnu Krajicu kuntentu držat! Jušto čera večer na prvemu ovoletnjemu maškaranemu tancu zibrana mu je nova Krajica, mepar je i on kuntent... Magari, mane se ovako od ženskega kantuna čini da se j' kot i fanj muškeh jušto zvicijal i zobjesil, pak se brzo štufa sake ženske. Ma mlad je još, šesan i zdržjiv ti naš meštar Pinel, pak mu morda i ni za zamerit, aš mu se tuliko mladeh i lepeh divojki nudi za Krajicu. A on mora najboju zibrat... Tr i sami znate kako to inače gre va krajevskeh familijah - ćeš-nećeš, pulitika zgora sega! Magar je to i ovista nema, pusna pulitika!

Da ne bite misleli da je samo pul nas tako, ni. I sa okolna mesta, od Gromišćine do Učki, su obesila svojga Pusta na pali, al na najveće drevo va sele. Va Kastve, ki nan je prvi sused, zibrana je i cela vlada z ministri, od keh je najvažneji ministar od financij Giovani Šteker, aš je fanj soldi zustalo od pasane turističke sezoni. Pa tako Kastafci od čera moru računat i na veći pržun s pogjedon na austrijski Alpi. Kastav je brez javnega natječaja (a to van je va zadnje vreme jako moderno) dobil i skijašku stazu Gemišt Partenkirhen, aš se pokazalo da se i pul nas va primorje more jako dobro skijat kad se pozabi cesti od velega snega očistit. Po navade se deli i nagrada Zlatna Broskva za najboje od pusneh nemotariji ki su bili pasanega Pusta.
Va matujsken kraje j' živo i veselo još od kad su žejanski zvončari jušto ob polnoće na Tri Kraji zakampanali z svojmi zvonci za fin od božićneh blagdani i početak pusnega kravala i na pal obesili svojga Hansa. Dan kašneje su i Munjci pomunjesali, a poten se j' i Gromišćina zatresla od Dondolaši.
Ja, dosti san tega tu besedila, kantala i tancala, vreme j' od obeda pa da i ja dobrega ča pojin! A ča će se va oveh sedan i pol šetemani jist i pit, lepo će se videt pu Matuj na festivale pusne hrani. Ja van moren malo gušta dat, lih da van slini poteču:
pašta al palenta ze slanimi srdelicami,
domaće kumbasice z kapuzon i palentun,
palenta kompirica,
jota z pancetun,
repa z fažolon,
domaći zapešt,
seh sorti fritul i kroštul,
presnac, supice, baškoti
i još čuda, čuda tega!
Tako, ja san van za danas svoje napovedala, a sad gren pijat joti pojist i žmuj naše Belice popit! 

...ja, tako van je to bilo prej dva... no, čuj mane bedaste... prej tri leta jušto na ovi isti dan. Danas je bičić drugače, Halubajci su, po modernu, zibrali meštricu od karnevala. Aj, ma ča bin volela bit na njejen meste kad bu kraja zbirala! Ma, moran mu reć neka se dobro pazi, aš bi reć da je meštrica sa vrajža, da ne bi finil kot i ovoletni Pust... Za onu stvar su ga obesili na pal! Enti jarca, tako ti je to kad ženske zamu vlast va svoje ruki! Zajeno moran jenu fritulicu v usta hitit, da me grč pasa!

Stojte mi dobri i veseli, munjeni i nemi kot i saka prava maškara, aš počel je Pust – ŽIVIO PUST!

Od Vilije Božje do Tri kraji

Finili su i ovi blagdani. Jelku smo zneli, balice spravili, šušur pogasili. Si smo se dobro najili i moguće, podebelili. I takujin spraznili. Lih ono ča zasprave rabi, ono ča j' Božić po praven, to smo pozabili. Ma neću ni ja fanj o temu predikat, aš ni ja ne moren više zaistinu reć ča je pravo. I ja san od te generacije ča j' navajna dobro jist i pit i kad je post, još više kad ni, pod škužun da su blagdani; od te generacije ča na Viliju Božju kiti jelku i od kuće dela monade i šušur i ka je navadila svoju dičinu na Božić pod jelkun nać sako leto draži regal kega njin je zdola jelke stavil nekakov fanjski i debeli nonić va črjenen veštide z belun bradinun ča su ga zmisleli Merikani; od te generacije, ča na Tri kraji nabrzinu se te monade znima i spravja va škatulu i ne spameti se da je jušto tisti dan po praven dan od regalanja... Ja, tr i ja se to delan...

A povedala mi j' moja nona kako j' to onput bilo, kad je ona mića bila. Ni se onput niš čuda spravjalo, aš se ni imelo skuda. Ni jelka se ni kitila aš to ni bilo po našu, lih po stranjsku, od Nemci da j' to prišlo va naši kraji.

Se j' počimalo na Viliju Božju... Tisti dan se po jutro za južinu popilo črno kafe, ni se smelo belo kot saki dan, aš je post. Kafe se j' većma od ješmika delalo aš je bilo fanj ceneje od pravega kafa. Na stol se j' parićalo rakije i suheh smokav i ako j' ki god prišal va kuću, to mu se j' dalo. Ženske su delale večeru, aš na Viliju Božju se sme samo jedanput najist do sitega, pa pravega obeda ni bilo. Pekal se kruh s cizibami kega se ni smelo jist ti dan - to je bil kruh za Božić. Frigali su se ulenjaki. Za večeru se j' kuhal bakalar po ken je cela kuća vonjala. To da j' bila siromaška hrana, a ne kot sada, gospocka. I broskva se j' užala kuhat na padelu. Muški su sprotu parićevali veli cok. Njega su kasno zapolne ali hvečeri kad zaškuri nesli va kuću na ognjišće. Ti cok se j' tu večer važgal, i ako j' bil dosti veli, pomalo je moral goret do Tri kraji, a ako je bil manji, onput ga se j' saki dan po malo palilo. I granu od javorike se j' parićalo za kladit na stol. Ma to vreme već je malo kuć bilo ke su imele velo ognjišće, pak su judi onput samo granu od javorike nesli va kuću. I slame se j' doneslo va kuću va znamen da drugo leto Bog va kuću sega bogato donese. Pa se šlo jist. Na stole j' gorela sveća i moral se i brus stavit. Dičina su bila lačna cel dan brez pravega obeda pa su komać čekala da njin mat stavi pijat na stol. A potla večere se 'j molilo i kantalo, ni se šlo spat, čekalo se j' Rojenje Isusovo, aš Vilija to i pomeni - zbujen čekat. Ma vaje su dičina pozaspala na slamice.

Drugo jutro, rano na Božić, se j' šlo va crekvu h maše. Plovan je seh blagoslovil aš se j' Isusić rodil, va ufanju da će judi va sloge živet, bit jedan drugemu napomoć, da će svet bit magar sledić boji leh ča j' sada. I na cimiter se j' šlo pokojne od familje obać kot znak da se ni pozabilo na nje. I onput se j' šlo doma veselo, obedvat. Jil se kruh namesto sakidajnje palente, juha od stare kokoši ka je jušto meritala va padele finit aš više ni mogla nosit jaj, kapuz i kakovo meso, najveć onista kokoš z juhi. I ulenjaki su se jili. A tako se jilo i za novo leto, jedino ča j' meso bilo najvećma od prasca al telca. Po seleh su obahajali "Staro leto" i "Novo leto" - Staro leto je bil kakov stari, za fintu pogrbjeni i va črne štrace obučeni čovek kot senjal da se ča j' bilo grdo i nikakovo ostaje zada va staren lete, a š njin je hodila lipa, mlada divojka va bele opravice, kot novoletnji anjel, a na čele njoj j' pisalo leto ko jušto prihaja - ona j' bila kot kakov znak da će novo leto bit boje i lipje od pasanega, starega leta.

A dičina kot dičina, najveć su se veselila Trimi kraji ki prihajaju šestega đenaja mićemu Isusiću regali prnest. Tisti dan su muška dica i mladići po kućah pohajali i kantali kanat "Tri kraji jahahu", bimo rekli po našu - koledali. Bili su lipo obučeni i sakemu su zaželeli zdravja, sriće i sega obilja va noven lete. V rukah su imeli lepe črjene jabuke ke su se zvale božićnice, va ke su njin judi kakov dinar železni zapičili za dobru ruku. Vavek se decu regalalo za dobru ruku z jabukami, orehimi ali bonboni i si su se ten regalon veselili. Ni bilo dobro ženske naprvo va kuću pustit aš se verovalo da ako ti ženska čestita prej muškega da će ti so leto nopak  i na nesriću poć. Zato su koledari vavek muški bili. I črno vino se j' točilo i pilo za dobru krv i dobro zdravje.

Tisti dan, na Tri kraji, je cok od Vilije Božje moral do kraja dogoret. Ugjene i popel ča j' od coka ostalo se neslo va poje pohitat da dobro rodi, va štalu se j' neslo da blagu ne bi ki roki storil, a užali su judi kušćić va žepe nosit da ih od roki i od štrig očuva. I kad se to ugjene razneslo i popel pohitalo, bilo j' već posema škuro, božićnemi j' blagdani bil kraj.

Ja, tako mi j' prej čuda let povedala moja nona... 

Od familje i živjenja

...eee, tu se more sačesa napovedat! I za smet se i za plakat, i za kantat i za bolovat...

1. Kad štriga zustane va iste kamare kade je i televizja...
2. Kafe
3. Potresujka
4. Uz kanat se lagje dela
5. Krasnoslov

Si za neč slatko?

...ma smo meritali, smo, i malo slatkega...

1. Homo frigat fritule!
2. Vuhteli al buhteli 

Ćeš ča popit?

... da se grlo ne osuši i štumik ne ćapa za škinu...

1. Vita za dobar dan
2. Nonin ajerkonjak 
3. 
   

Mogli bimo ča večerat

...da je lagje zaspat, neč ča će zdurat celu noć...

1. 
   

Obed je na stole

... a na pijate je...

1. Kapuz kiseli z domaćemi kumbasici i vinon, z peknjice
2. Seljačka pita od pora i skute
3. Salsa za si gušti

Za dobru marendu

...bimo mogli pojist i popit...

1. Kako storit domaći sir

Od našeh užanci

...ono kako se j' nekada živelo po stareh užancah, za blagdani i sagdani, ča j' morda neč i danas tako zustalo, ma morda se već i pozabilo i zgubilo...

1. Od Vilije Božje do Tri kraji
2. Kroniki od Pusta - Antonja na Kvarnere
3. O mlikarici
4. Mesopusne monade 2014. leta
5. Kako j nekad na Si Sveti bilo
6. Kastafska Martinja