Venac od Božje jubavi, kuglof na stole

Prva j nedeja potla Katarinine, prva nedeja Adventa. Užanca ka se udomaćila po svete, pa tako i pul nas, je da se stori venac š četire kandele, saka za svoju nedeju pred Božićon. Venac al prsten od zeleneh grančic nima ni početka ni kraja, baš kot ni Božja jubav i život večni. Zato j nekako skupa z ten užanca i kuglof peć va adventsko vreme. Tako san i ja, na ovu prvu adventsku nedeju ovega leta, storila i venac i kuglof po staroj noninoj ricete.

Pred čuda, čuda let moja j nona ovu ricetu zapisala va svoju tekicu. Delala ga j puno puti, tuliko da se od maćic na karte komać videlo ča piše. Imeli smo ga jako rada. Pasalo j puno let otkako san i ja prepisala tu ricetu ž njeje va svoju tekicu. I delala san ga puno puti. Tuliko da se od maćic na karte komać vidi ča piše...

Za kuglof van rabi:

 4 jaja 

1/4 litre cukara 

1 žlica cukara z vaniljun 

7 žlic masti 

1/8 litre mleka 

1/2 litre muke 

1 žlica šode bikarbone

1 lemuncin al naranča 

2 rebra cikulade 

1 žlica ruma

a za prelet:

2 rebra cikulade
1 žlica cukara

1/2 deca mleka 

3 žlice putra

Se mere su po starinski merene, va litre i žlice (oniste za juhu).

Kalup za kuglof pomažite z mastun i poprhajte z mukun. Se ča j previše stresite vanka.

Peknjicu stavite teplit na 200 stupnji.

Najprvo van rabi muku proset da bu lahka i brez grudvic. Zajeno va nju zmešajte i šodu.

Žutnjaki i belnjaki stavite posebe, sako va svoju padelu.

Koricu od lemuncina al naranče zribajte i ocedite pol soka.

Na banjomariju stopite cikuladu za kuglof i držite ju mjačnu.

Belnjaki dobro stucite va sneg.

Žutnjaki, cukar i cukar z vaniljun dobro mešajte da pobeleje, pa ze sen ten zmešajte i mast. Na kraju dolejte i mleko.

Malo pomalo tresite nutra muku, smiron mešajuć da se ne delaju grudvice.

Razdelite testo napol va dve padelice. Va jedno dodajte zribanu koricu i sok, a va drugo stopjenu mjačnu cikuladu i rum. Saku polovicu dobro zmešajte pa njin dodajte i sakoj po pol stučenih belnjaki. Sad pomalo mešajte žlicun da se belnjaki ne spušu posvema.

Va kalup zlevajte malo jednega, pa malo drugega testa. Poten zamite tanki nož pa šarajte po testu neka se na lahko zmešaju kolori. Tako će kuglof doć lepo šarasti.

Stavite kuglof peć va vrelu peknjicu 40-45 minuti.

Dok se kuglof peče, na banjomarije stopite mleko, cukar, putar i cikuladu da bu glazura luštra. Neka se zmjači.

Kad je kuglof gotov, znamite ga na rešetku i odzgora ga pomalo prelevajte žlicun i mažite tako da glazura pada i va škuju i zvani.

Kad se malo prohladi, stavite gotov kuglof na pijat.

Kuglof morete jist i mjačni i posvema mrzli, z kafon, z mlekon, al po gospocki z čajon. Lepo ga j videt na blagdansken stole, ma i po obične nedeje.

Kastafska Martinja

- Nonić moj, reči mi, ako j' Martin bil svetac, zač ni prišal ze Semi Svetemi, leh ovako posebe, zad njimi?
- Vnuk moj lepi, Martin je na početke šal ze Semi Svetemi, ma j' bil fanj žejan, pak je po pute sako malo gutić storil z tikve i spražnjenu tikvu po seleh natakal, a vino mlado, aš drugega tu dobu ni bilo, ga j' zmutilo, pak ni više mogal koraka držat z drugemi. Zato j' prišal deset dan kašneje...

Jedanajstemu mesecu tu pul nas va Kastafšćine oni najstareji judi deju "martinjski mesec" aš je to mesec va ken se slavi Sveti Martin ale Martinja. Da njin rečeš studeni, ale novembar, bledo bi te gjedali, ne bi te pravo razumeli.

Va oven, martinjsken mesece so veje popada z dreva. Deju judi da to Martin stane na vrh kranjskega Snežnika i da zame dugu majčinu, pak oklati so veje od Snežnika do mora. Zato se i reče po staru "Martin je veje oklatil". Ma za Martinjun užaju trefit lepi dani, pak to zovu "martinjsko leto". Onput judi užaju ruži obrezat da bi h lete va sakoj jagode bila popčica manje i tuliko vina više...

Va Kastafšćine ni užanca da se na Martinju vino mlado "krsti". Za vino j' važneje ono vreme kad se vino otače, ale otakalnica, a to je fanj raneje leh Martinja, aš je i trganja raneje, najkašneje do pol devetega, mihojskega meseca. Na otakalnicu rada pride sused susedu pomoć i mlado vino provat ako j' dobro, a najveći blagdan od mladega vina j' Bela nedeja. A dobro j' ovo naše vino, kastafska belica. Pilo se j' nekad i va cesarskoj kuće va Beče. Ni jako kot dormatinska i istarska vina, ale ima dih lepi i neki dobri gušt. I nikada ga ni rabilo krstit. Ma sad, va ovo vreme kad su se zmešale užanci od seh kraji i kad su se skoro posvema zatrle one stare užanci, juden i tu mlado vino dojde "Sveti Martin" blagoslovit.

Ma ja ću van rada povedet ča se tu, va Kastafšćine kakova j' nekad bila, užalo delat na Martinju.

Nekada j' bila užanca da j' župan hodil po seleh na Martinju jutro i zijal "Martinja je! Trebe po staroj užance jarušića na ražnje speć! Boje da selo zgori lego da se užanca zapusti!" A jarušić je mladoletni jančić. Onput su judi čuda ofci imeli i užanca j' bila da se na Martinju i još ki put va lete, utinut na Vazam, jančića odere i speče.

Ma jeno selo va Kastafšćine - Garići - imelo je još jenu martinjsku užancu - martinjsku brigaču. Današnji judi morda ni ne znaju za to, stari su pozabili, a mlaji morda nisu ni čuli. Deju stari judi da j' neki Franina, pred čuda i čuda let, za martinjski obed, ča mu ga j' nevesta skuhala, na pijat dobil kapuz z ulen zasmočen namesto zapeštan, a za večeru kavaradu. Tuliko se razjadil ča ni dobil ono ča j' stara martinjska užanca, da j' storil tištament i svoj parat pustil neč crekve, neč "za brigaču" drugen va sele. Tista brigača j' bila njiva za ku su se skrbili i uživali susedi. ma nisu ju dobili za niš - onista kuća ka j' uživala njivu, morala j' na Martinju svetu mašu platit i parićat veli i bogati obed ale večeru za si muški susedi. Ta obed al večera se 'j zvala "martinjska brigača". Ženske su jako skrbele da jilo bude dobro i bogato, aš ako bi martinjska brigača slaba bila, susedi bi mogli miselt da su slabo skrbeli za njivu, pak ju zet i dat drugemu, za kega su misleli da će boje gospodarit i obdelevat, skrbet za njivu. Užanca j' bila da se brigača parićuje va konobe, a ne kot vavek va kamare ale va kuhinje, i da mora ob ubroke bit mesna juha, kakovi makaruni va dobren šuge i siron poribani,  presnac, urehi i najbojo vino... Ni više stareh judi, ni više ni brigače, zadnja j' bila leta 1898., ma njiva negdere pul Garić, ta del su zvali Brigačno, još vavek stoji i ki zna ki ju sadahna obdeleva, ale j' morda kakova vela moderna kuća na njoj zilezla nebu pod oblaki, ne kot nekadajne starinske kući na pod.

Martinja je. Va soj Kastafšćine već 100 let ni nijene ofci pak se neće jarušić na ražnje obrnjat. Ni župan ne zija po sele. Ni ni selo zgorelo, ma stara se j' užanca sejeno zapustila... I belice kastafske j' malo, lih kade kakova ruža ča'j zdavna ostala... Sad su neke nove užanci, vino se krsti va sake oštarije magar ni više tuliko mlado, i guska z mlincima i maruni se peče...

A se ove stare užanci vredno je zapiševal barba Zvane Jardas va svojen libre "Kastavština", a ja se to rada čitan, i potla van povedan, da ne pozabite, da se spametite, ale da  neč novega navadite vi ki niste još tisti libar vruke imeli.

Kako j nekad na Si Sveti bilo

Kastafšćina, kraj je va ken se domaći judi i danas drže nekeh stareh užanci. Ma, od tulikeh noveh, stranjskeh, stari se običaji i uvde pomalo zatiru. Blagdanski su dani, bilo ke sorti, vreme kad stare užanci va nan zbude i žal i radost, vreme kad je familja na kupu. Blagdan Sih Svetih jedan je od važnejeh dani va lete za celu familju. Ni se onputa tikvi dublo i žnjimi strašilo, nisu se deca maškarala i po kućah bonboni pobirala, ni bila noć od štrigi, a metle su spravne čekale jutro...ni to našo...

Nekad je blagdan Sih Svetih bil tužan dan. Žal za dragemi ki više nisu z nami oćutil se na saken kantune. Tega dana ni se obahajalo okol susjedi, ni se hodilo na ćakulu i žmuj. Već hvečer pred Si Sveti, na viliju Seh Sveteh, palili su se lumini za pokojne duše - va žmuj se levalo vino i uje, pa se na tanken plutenen podnogu važgal žižak ki je gorel dok je va žmuju bilo uja. Lumini su goreli celu noć, na sami dan Sih Svetih, ma i drugi dan, Sehdušdan. Lumini i sveće važgevali su se na dan Seh Sveteh i na grobin. Grobi okićeni z rožicami i svećami obahajalo se cel dan, panajma rano zapolne kad je z crekve došla procešija, ku j predvodil plovan, pa se molilo za sve pokojne. Ma kad je sunce zašlo, cimiteri su utihnuli va svojen veličanstvenen blagdansken osvetlenju aš su do Zdravomarije si već bili doma.

Obedvalo se j tega dana fanj skromno, komać salata od kapuza i sled konpira, dokla j na stole gorela sveća. Za večerun je bilo posvema tiho, ni se niki z niken pogovaral. I deca su tu večer morala bit tiho. A potla večere palile su se miće sveće, jednako vele - kuliko judi va kuće, tuliko sveći. Najstareja ženska va kuće j vodila molitvu Ružarija.

Sveća j stala nasred stola va velen kandelare. Ma miće sveće su imele posebni, samo za tu prigodu storeni "kandelari". A evo zač je to tako bilo - blagdan Sih Svetih je va štajone od kapuza, kad se kapuz pobira i kiseli. Judi su va to vreme koristili ono čega su imeli najveć va kuće i okol nje, pak su i blagdanske užance bile va sklade z oten kako su živeli i ča su delali. Tako se va Kastafšćine, kraju va ken se najveć kapuz sadil i gojil, užalo dubit koreni kapuza va ke se nataknula mića sveća. Ta užanca, kako storit kandelar od kapuza j tokala decu, ke je to va isto vreme bila neka vrst zabave, ma i pametan mod kako decu na tistu posebnu večer držat na miru i mučat. Sveće su se važigale na čast pokojneh, ma tako su stari Kastafci zazivali i Božji blagoslov, da njin kiseli kapuz čin boji bude.

Na Gromišćine, povedala mi j nona, već na prvu škurinu te večeri Sih Svetih, judi su se zapirali va kuće, ćakula j utihnula. Taj dan se ni nikakovo delo delalo, lih ono malo ča j rabilo po kuće storit. Ni se j, kot obično pohajalo po kućah do večeri, aš niki ni otel da ga vane škuro ćapa. Ki je mislel pul kega na žmujić poć, al poćakulat, do prvega škurega j doma tekal. Sablasna tišina obavila j sela, a šume okolo kot da su bile još črnje i škureje. Činilo se j kot da j i Rečina utihnula.

A onputa, kad je već bilo trdo škuro, kad se j pojilo ono malo ča se j ti dan kuhalo, si bi zamučali... Na 8 ur večer na Si Sveti zakampanala su zvona od crekvi, a judi su va kuće potiho molili. Dugo su tu noć zvona kampanala, užala su i po dve ure. Pala j noć va koj se duše pokojnih vrnjaju na ov svet i dohajaju doma, da obajdu oneh ki su još živi i da pokažu ki od njih će prvi za njimi poć... Saki j va kuće imel svoju sveću važganu pred sobun, i stari i deca, si jednake sveće. Moralo se posvema mučat za osluhnut saki šušanj ako su duše već prišle. Po kega su prišle? Jeza i strah su se juden va kosti zavukle i jedino ča j saki od njih želel je da baš njegova sveća čin daje gori - ni dihat se takorekuć ni čulo, da ne bi, ne daj Bog, dah sveću pogasil. I poneštre i vrata, se j bilo trdo zaprto da ne more arja va kuće kakov propuhić storit. Ma kuliko god pazili, nekemu j sveća morala prvemu zgoret...

I jušto sad dok van ovo pišen, mi se čini da neč vane šušnje... Ste dobro zaprli vrata i poneštre?

Vuhteli al buhteli

Va mojoj kuhinje morete pojist i popit sakakovega jila i pila. Najraja kuhan ono ča j okol mane - domaću hranu na starinski i na moderni mod. Ma jako iman rada ki put i storit kakov izlet na pijate, đir po svete, bližemu i dajemu. Tako j bilo i ovaj vikend, kad san se baš zaželela buhteli (al vuhteli) kakove je moja baka Turopoljka užala delat. Ma ne bin ja bila ja da neč svojga ne hitin nutra... neč ča će saken jilu, skud god prišlo, dat magar sledić našega primorskega gušta.
Moja nona Gromišćica jih ni užala delat, ma jih je jako rada imela pojist. Mehki i još tepli, z filun od skute, al z marmeladun, pijažali su njoj se baš tisti bakini. Dišeli su ovu subotu z moje peknjice, od Češke preko Beča i z Turopolja na Kvarner, a ja san na njih obadve mislela dok san jih mesila. 

Za testo će rabit:

pol kila muke

bičić soli

15 deki cukara

1 vrećica vanilje

2 žlice suhega kvasa (to j jedna vrećica)

2 jaja

15 deki putra

2 deci mleka

A za filu od skute z malo primorskega gušta rabi:

30 deki skute

2-3 žlice cukara (ovisno kuliko j skuta kiselkasta)

paketić vanilje

1 jaje

malo kanele ako imate rada ta dih

i 1 z vrhon puna žlica mjeveneh menduli

Za toćat buhteli:

dec uja

otprilike tuliko putra

I po voje za odzgora:

malo mjačnega mleka za pomazat

kristalni cukar

mleveni menduli

i cukar va prahe.

A sad gremo delat.
Mleko zmjačite i va njega natrgajte, al narežite putar da se rastopi - ne rabi posvema bit rastopjen, stopit će se kad bute mesili.
Odmerite pol kila muke, pa va nju dodajte sol, cukar, vanilju i kvas. Malo zmešajte pa poten dodajte mokri sastojki - najprvo zmutite jaja, pa dolevajte mešajuć i mjačno mleko z putron. Nož, al žlica, al kakova lopatica će van dobro doć za se to malo zmešat dokla muka ne popije mleko. A kad više ne bude tuliko mokro, se stresite na dasku ku ste malo poprhali z mukun. I zamesite glatko, elastično testo. Od testa storite jednu balu, z oštren nožon prekrižite, stavite nazad va onu istu terinicu al padelicu va koj ste i počeli delat i pokrijte z krpun i stavite va stran, nekamo na tepleje mesto da se zdiže. Ne pozabite, ča od srca delate, vavek će na dobro doć!

Dokla se testo diže, od skute, cukara vanjilje, jaja i malo kanelice zamešajte filu. To bi bila ona osnovna fila. Ono ča san ja storila onako po svoju - nutra san hitila i malo mjeveneh menduli - i nisan pogrešila! Provajte i vi! Se dobro zmešajte, pa ćemo se poć igrat.

Za toćat buhteli rabi nan putar rastopit va malo uja. Neka bude mjačno da j lagje toćat.

Parićajte latu va koj ćete buhteli peć - va nju stavite pekpapir pa ga premažite z malo rastopjenega putra.

Testo se već zdignulo, puna ga j padela! Dasku ponova malo poprhajte z mukun, stresite zdignuto testo i posvema na lahko ga premesite. Razvajajte ga va kvadar malo veći leh ča j lata ku ste parićali, ne mora bit jako tanko. Z oštren nožon testo razrežite najporvo va trakice jeno 3 prsti široke, pa va kvadri.

Kvadrić po kvadrić još malo va ruke raširite, stavite miću žlicu file na sredinu, pa kantuni ćapajte skupa, pa z rukami storite balicu. Balicu po balicu potoćajte va stopjeni putar z ujon, pa slažite va latu. Neka se komać dotiču jedna druge, ma ne jih narivat aš će se speštat. Kad napunite latu, buhteli premažite z mjačnen mlekon da korica bude lepča. Ono ča ja volin storit je odzgora poprhat z kristalnen cukaron, a ki put i z mlevenen menduli, pa buhteli dobiju malo gušt na karamel, a korica hrska kad jite. Ako ste i to storili, pokrijte se z krpun i pustite još malo da se zdižu na teplemu. Zdignuti buhteli stavite peć na 200 stupnji otprilike 40 minuti.

Pečeni buhteli znamite z peknjice, i ako imate drveni taruj, znamite jih na njega z late. Morete jih i va late pustit. Kako god ste storili, odzgora jih poprhajte ze cukaron va prahe.

Počekajte da se malo ohlade prvo leh ćete jist aš je skuta nutre vrela. Nemojte zajik opeć kot ča san ja, vrajža lakomija!

Krasnoslov

Avamane, ča mej tokalo!
Prišal je mići Kiko doma ze škole i z vrateh zija "Mama, moraš mi pomoći!"
- Ča je, ča vapiješ - pitan ga - ča kade gori?
-Ma ne, nije ništa takvoga, nego moram za sutra naučit krasnoslovit nešto...
-Ča moraš???
-Naučit krasnoslovit moram...
-Ča??? Kako si rekal?
-Što sam rekao?
-Pa to...neč..slova nekakova...
-Aaa, krasnoslovit! Ma moram naučit napamet pjesmicu Moja zemja od Drage Ger...nešto, ne znam kako se zove...
-Žervea! Drage Žervea, tako se reče. Pa tr ti to ni teško, ni duga.
-Da, nije duga, ali ju sutra moram krasnoslovit na dijalektu, i to pravom, sa svim naglascima... Pitala je profesorica govori li nam netko domaći, ja sam se javio jer ti stalno tako govoriš. I samo još jedna cura...
-Ča čitat moraš?
-Ne, krasnoslovit.
-Ma mali, ki klinac je sad pak to?....
-Joj mama, pa kako ne znaš? Ono kad moraš ustat ili izaći pred ploču, pa odverglat cijelu pjesmicu...
-Aaaa, recitirat! Pa tako reči, ki je kad čul za tu tvoju besedu?! Kako si ono rekal?
-Kra-sno-slo-vit! Krasnoslovit! Kako ne znaš?
-Mali, kad san ja va školu hodila, mi smo recitirali! A ne krasnoslovili! Kakova je to bedasta beseda, da krasnoslov... za Majku Božju, ča vas pa to vade va toj škole?
- Ha?? Iz čega nas vade?
-Ma uče, ča vas to uče... to se tako nikad ni prvo govorilo, a i nima ta beseda nikakovega smisla! Ja bin prvo rekla daj to neč... nekakovo krasno pisanje, ona ukrasna slova...Tr slovo je samo pisani znak za glas, nas su tako vadili va škole! Glas je ono čaj bitno, A slovo je tu samo zato da se napiše to čaj glas izgovoril, besedil! Bilo bi boje da su rekli krasnobesediti, al ako bi baš oteli po starinski, krasnoglagoljiti...krasnosloviti moreš samo z lapišon po karte...

Va ti čas evo na vrata i starejega. On je srednjoškolac, pa bi normalno bilo da i on zna za tu besedu. I pitan ga ja zajeno
-Čuj, znaš ti čaj to krasnoslov, al krasnosloviti? - a on me brižan bledo gjeda.
-Nikad čuo, otkud ti to? Misliš krasopis? - i homo jovo-nanovo se po rede špjegat se ovo ča van već naprvo piše.
-Što nisu mogli normalno reći - recitacija, recitirati? - mahne on z rukun i parti va kundot.

To smo rešili. To je bil lagji del. Za par minuti evo Kikota z libron. Otpre i počme čitat. A mane se si vlasi zdignu.
-Pobogu, otrok, ščije rite si ti vanka pal? Ča si mane tako čul povedat? - tlak mij udril va čelo. - Daj to semo...
I tako ja njemu pročitan kako mi po domaći govorimo.
-A kako ti možeš tako brzo pratit sve te crtice iznad slova?
-Kakove crtice? - pitan i komać sad vidin da su na slogovin one crtice po ken bi čovek trebal znat kako se ča izgovara. - Ma ča će mi te crtice, tr znan kako se ča reče! - i pročitan mu još jedampta, da otrok zapameti.
Šal je on zadovojan va kamaru, to navadit. To j bilo 5 i kvarat zapolne. Evo njega za kvarat ure, da mi...krasnoslovi... čaj navadil... Par greškic, al najveć me vuho bode ono Ć...
-Mali, ma kako to Ć govoriš? Ča si pozabil?
-Reko sam ja...
-Nisi!
-Jesam!
-Nisi! Tr nisan gluha! Ponovo!
Recitira on, ma to Ć ne moren progutat...
-Ma gjedaj semo! Zalepi zajik malo na nazad vajer, va nebo! - pokažujen mu ja kako j najlagje reć našo domaćo Ć, a on me brižan pita da kakovo nebo... -Ma nepce, vrah zel i nepce! Tako namesti zajik i samo ga naglo spusti ko da biš rekal T. I gotovo! Ni lagjega! - i lepi on zajik, ko da nikad ni normalno Ć rekal. Naše normalno, ne po hrvacki.
-Ala, ponovo! I pazi na to!

-Drago Žere...
-Ma ki žere?!? ŽER-VE! Ponovo!
-Drago Žerve, Moja zemja. Pod Učkun kućice bIJEle...
-Stani! - zavapijen - Kakove bIJEle? BELE! Ponovo!
-Drago Žerve, Moja zemja. Pod Učkun kućice bele, miće kot suzice vele. Beli zidići, crveni kro...
-Kakovi??? ČRJENI! Poberi se nazda va kamaru to kako rabi navadit!

Toj bilo na 6 manje kvarat... Za dvajset minuti evo njega nazada... Počne on, i za čudo, sej bilo kako rabi, samo je malo pozabil pred kraj, tamo kade j uska rečica, malo se pogubil. Ma izgovor je bil posvema kako rabi.
-Viš kako umeš! Ala dajmo ponovo, bez zastajkivanja.
I bome, skoro j se dospel! Još jedanput...i još jedanput... A mane obrva skoči... triput je Ć pogrešil...
-Kakove kuČice ti spominješ, ki je ča zakučil? - pa sej ispravil. Kad odjedanput...
-...tanki putići po keh se... auti pejaju...
-Čaaaa??? Mali, leta si pogrešil! Kakovi auti? Vrah zel i auti! - i se ča daje, se je više grešil, a mane se više jad ćapeval...i ponovo, i ponovo....a on još ni drugu zadaću napisal... a na ure 8 i pol! - Hodi zadaću napisat, vrah ti je matere!
-Gladan sam...
-Neka si! Nećeš dobit niš dok se ne finiš! - potiran ja njega va kamaru, kad evo ga za kvarat ure da j gotov, da bi večeral.
-Dobro, ma kad pojiš, još ćeš mi zrecitirat.
Vrtel je po usteh pol ure ono ča bi normalno va 5 minuti pojil, ma grusti mu se, aš zna ča ga čeka. Šal se obuć va piđamu i prišal hmane još jedanput provat...avamane, ko da prvi put recitira! Ma sad je bilo dosti ni lazno više, vreme je za poć spat aš je škola jutro.

7 manje kvarat, jutro... zbudila san ga i poslala va kupatilo oprat se. Ma ni ga vanka kvarat ure skoro, već se fila za kundot storila. Kad va ti čas zleti on i zija - Mama, mama, sad sam probao i bez greške je bilo!
-Ala, daj da čujen...
Va hipu je on to odrecitiral, bez ijedne greške. I partil va školu zadovojan. A kako j va škole bilo, to morete čut i sami, aš smo ga i mi još par dan naslišali, kuliko je ponosan bil sam na se i na peticu iz "krasnoslovljenja na dijalektu".

Uz kanat se lagje dela

Neki bi rekli da besposlen pop i jarići krsti. Ma ja bin rekla da rabi kiput i zakantat, pa je lagje delat. A reču i "tko pjeva, zlo ne misli".

Nisu karaoke ko ča to po svete judi delaju, leh posvema onako kako bi Merikani i Englezi rekli what you hear is what you get, pa je morda boje začepit uše i molit Boga da Gina ne čuje ča san njoj storila 

Salsa za si gušti!

Leto pasiva, turisti su šli doma. Ne znan ni sama bin rekla "Ča već?" al "Napokon!" aš ovo leto ko da ni ni bilo leto. Dažjeno i mokro i ne baš preveć teplo. Ma da ste me pitali još tamo protuletu kakovo će bit vreme, ja bin van jušto tako i rekla. Ma zapravo, rekla bin i da će sekire padat! Znate zač? Aš san se po prvi put va živote ćapala zasprave vrt delat. To kad je čul onisti gore ni znal će se pocurat od smeha al će plakat od muke i zato van je vreme bilo tako zmešano. Ma kakovo j bilo, bilo je, mane j vrt bil pun sega i sačesa, valda po one stare - čin bedasteji seljak, tin boji konpir! Se san ja lepo još h protuletu na karte narisala kade će ča bit poseveno i posajeno, ćapala se kopačice i zorala kus zemje i storila kako san zamislela. Ma kad je počelo rast, bome san se morala malo i zada uha počešat aš san našla čuda tega ča j počelo rast na drugemu mestu, ma i neč ča j raslo, a sigura san da ja to nisan posela... Skud je pa to prišlo? A prišlo je, prišlo, kot ča san i ja...

Ste se kada zamisleli, kako to da ste tu kade ste? Skud su prišli vaši stareji? Si smo znekud prišli, je tako? Ja san rojna v Reke, malo zdola Pehina, pul Pinturić. To da j jedan moj predak kega su zvali i Pintur imel prvi tamo kuću, pa se potla to mesto po njemu zvalo. Bilo je tu par kuć i se su imele vrti i fanj zelenila okole, ma pravi mići raj na Zemje! Blizu j Zamet i Turnić. A kako san ja finila tu na Pehin? Ma da ni bilo moje bižnone Pavice ne bin ja danas sedela na škalinu na privratu od kuće z laptopon na koleneh i ovo pisala, ni vi čitali moje besede i ne bin bivala tu kade bivan. Zapravo, ne samo nje, leh cele njeje familje. Na, va čas ću van povedet kako j to bilo.

Pred okol sto let prišal je prvi muški član te familje z Kranjske v Reku zarad dela. Bil je zadovojan i vaje su zad njin prišli i drugi. Tu na Pehine su storili kuće, jednu, pa drugu, pa tretu... kako su za sobun dopejevali familje, ženili se i decu rodili. Hmalo j tu bilo više od pol kranjske familje. Ma to ča pišen "kranjske", to ne mislin na Kranj kot mesto pul susedih va Dežele, leh na celu pokrajinu slovensku, kako se onput zvala. Zapravo, ti moji stari su z Jelšan, ča bi reć skoro pa tu, naši, domaći. Tako j z Jelšan jenega dana prišla i moja bižnona Pavica. Ne na Pehin kade su se njeji brati naselili, leh dole pul Pinturić kade j već bivala njeja sestra ka se za jenega Lenca, potomka od onega Pintura, oženila. Tisti j imel brata ki j va kitačas postal moj bižnono Marjan. Dva brata i dve sestre bivali su kuća do kuće, va vrte punen sega i sačesa ča njin je rabilo za prehranit se, za popit kapić vina, a najveć je bilo rožic seh lepeh starinskeh sorti ke j moja bižnona prodavala v Reke na place da i ona priskrbi ki dinar va kuću. Pavica j bila žvelta, skrbna i znala se j snać va semu ča nju j tokalo. A ni zajik joj ni bil manje vredan. Njoj i Marjanu se j rodilo tri sini, od keh je jedan za neko leto postal moj nono. On je oko hitil na jenu lepu Gromišćicu, ni manje ni više leh potomkinju onistega poznatega Martina ki j prej nekeh 360 let prišal na Gromišćinu i na Ričine z braćun selo zasnoval i malin storil, ki i danas meje najboju muku va našen kraje. Brzo j  nono tu Gromišćicu doma pripejal h Pavice, a malo za ten se j i moja mat rodila. Ona j pak zapela za oko jenemu susedu, par kuć niže. To j pa jako razjadilo njegovu mat ka j otela da on oženi neku z njejega kraja va Istre i tu j nastal celi kažin. Ja, ma taj sused ni baš otel poslušat svoju mat, pa je postal moj otac... Mi se čini da san ja nekako fanj na oca. Ča j daje bilo, i lepo i grdo, finilo j tako da san ja sad jušto tu kade j onisti prvi Kranjčev, kako smo vavek zvali tu stran famjilje od bižnone Pavice, odlučil stavit prvi kamik svoje kuće. Rekla bin, kad san slučajno finila na Pehine, va kuće kamo san kot mića užala dohajat z nonun i nonoton familje va gosti, da san se vrnula svojin korenon. Potla čuda let, ča j kuća bila kako kemu za doć malo zarad vrta, za prespat, zaprta bit, kuća j oživela. Žnje se čuje beseda, smeh, čuje se i kantat i zijat i kjet, čuje se život.

Kad to ovako malo zduga gjedate, rekli bite "Majko moja, pa ta ženska j posvema zmešana!" I ne bite pogrešili. Ćistokrvna mešanka! Saki ki j prišal va našu famjlju donesal je neč svojga, neki svoj začin. I se diši na pravu, moćnu salsu, ma jušto kot ča j ova moja, ku danas kuhan za obed! Prava salsa za si gušti! Ča j više tega va njoj, ona j boja i boja.

Kad san se već tuliko napovedala, ću van zajno povedet i moju ricetu za salsu. Ma najprvo gren va vrt nabrat se ča mi rabi!





Za četire peršone rabi:
-1 kilo črjeneh, zreleh pomidori, a more i ki dek više
-2-3 glavice kapule
-jeno 2 paprike
-1 manja balancana, a morete i tikvicu ako nimate balancanu
-3 zrna česna
-dobra pest petrsina, malo šeglina, par listi bašelka i kitica ruzmarina
-sol i papar po gušte
-žlica-dve cukara, ovisno kuliko su pomidori sami po sebe slatki al kiseli
-i malo uja od ulik.


Najprvo stavite pomidori, paprike i balancanu va vodu da se operu od seh monadi ke po zraku lete. Poten olupite i nakosajte kapulu, ne preveć sitno. Padelu stavite teplit i va nju zilejte uje od ulike tuliko da pokrije dno od padele. Neka se uje stepli, pa komać onda hitite nutra i kapulu. Zmešajte i malo posolite da kapula na pomalo pusti svoju vodu. Za to vreme morete već pomalo i ki pomidor zirezat na kušćići da imate parićano. Očistite i narežite papriku, pa ju hitite kapule. Ne rabi van niš podlevat, neka se se šufriga va svojoj vode va pokrivenoj padele. Jušto za tuliko vremena kuliko j paprike dosti, balancanu narežite na kvadrići, pa dodajte va padelu. Pokrijte i kuhajte par minuti na pomalo da balancana malo povene. Va to vreme ste već si pomidori parićali. Sad jih lepo zamešajte va padelu, popaprite, dodajte cukar da ubije kiselinu od pomidori, ma pazite da ga ne stavite preveć, tr ni kolač! Hitite nutra i kiticu ruzmarina, pokrijte i pomalo kuhajte, ne više od kvarat ure! Ne podlevajte, aš su pomidori puni soka, spustit će jušto kuliko rabi za dobar toć. Dok se salsa kuha, pripravite i onaj zadnji gušt ki će pojačat se arome ke su pod ten pokrovon. Na sitno nakosajte česan, petrsin i šeglin i par listići bašelka. Leh minut-dva pred sam kraj hitite va salsu, tako će se gušti od česna i zelenila najboje složit z povrćen. Provajte ako j dosti slano, pa ako rabi doložite još ko zrno soli.

Tako, moja salsa j gotova, ovako črjena, dišeća, puna gušta od povrća ko san po prvi put va živote so sama zgojila va svojen vrte!

Ako više volite da van salsa bude onako kot velud, glatka i bez oveh kušćići od povrća, se zmiksajte z onen šćapnen mikseron kega va današnje vreme saka kuća ima, al po starinski zvrtite na pasirku. Ja volin ovako, oćutit se ča jin.





A ča h salse? Morete paštu, najboje z ovakovun salsun pašu penete al neka slična pašta na rige, ma ja ću raja jendan dobar kus palente....






Dobar van tek, dragi moji!




Ja, skoro san pozabila... da van je lagje skuhat, se morete pročitat, videt i čut i na videu kega san van parićala. A morete i zatancat!

Nonin ajerkonjak

Danas ću van povedet kako me j' moja nona navadila delat ajerkonjak, al kako bi se to danas reklo - liker od jaj. Već je fanj let pasalo otkada smo nas dve skupa to pomalo mešale, smele se kot dve koze smiron žličicu obližujuć, onu s kun smo pokušale ako j' premalo al preveć rakije nutre... Nonica moja, fališ mi zasprave...

No, kade san ono stala? Aha...

Zlatno pravilo j' da 
na 1 jaje gre
10 deki cukara
dec mleka
pol deci rakije
i pol paketića vaniljcukara.

Ja ću ovaj put storit liker od 3 jaj, ča bi onda bilo i 30 deki cukara, 3 deci mleka, dec i pol rakije i paketić i pol vanilje.

I onda... va lonac od jeno litre i pol stresite cukar. Njemu dodajte samo žutnjaki, a belnjaki spravite za ča drugo, morda za nekakove puslice, aš se jako lepo jidu z ajerkonjakom. A ako umete, morete i šampite storit (navadit ću vas i to jedampta). Cukar i žutnjaki dobro zmešajte dok se ne zabeli i ne dojde kremasto. Zmešajte i vanilju va to. Mleko zmjačite tuliko da van prstu ni vrelo kad provate teplinu. Dolejte jeno dec žutnjakon i cukaru, pa žvelto zmešajte da se žutnjaki navade na teplinu i da se ne zgrudaju. Potla mešajte pomanje i malo po malo dolejte so mleko.
Mane j' nona navadila da će saka ženska jaja najboje zmešat i najboji ajerkonjak storit - med nogami! Hahaha, ala, ala, na kokošja jaja je mislela! Ako prestanete mislet na bedastoće, ću van povedet i zač je to rekla - teplina od tela, od nog, i mjačno mleko će boje stopit cukar kad se pomalo meša, a jaja će boje zgusnut i dobit ćete jako kremasti liker. Nikakovi mikseri ni ove moderne monade neće van storit tako dobar ajerkonjak kot lonac med nogami i kuharica v ruke! Zato se lepo posedite kade van je naredno, namestite lonac i pomalo mešajte da se ne dela vela pena. Zakantajte si čagod (ma ne potresujku!) da si delate ritam aš će podurat siguro jeno kvarat ure. Mane se po glave mota onaj lepi Snežni valček magar je Vazam...

...Padaj, padaj, beli sneg preko travnikov in streh

in z odejo vse pokrij, v belino vse ovij!

Zdaj, ko burje hladni piš se vrti okoli hiš,

v topli izbi za pečjo dlani si ogrejemo!

Se vrte snežinkice kot srebrne zvezdice,

ko na okna riše mraz rož ledenih bled obraz.

Je še potok onemel, vrbo v belo sneg odel,

je speljana ozka gaz v mojo domačo vas.

A v gozdu vse zaspalo je,

veje hrastov, smrek, nič več ne šume,

med grmovjem srnic so sledi,

že pokrite so s snegom, shojene vse poti.

Kad se cukar vas stopil dolejte rakiju i mešajte još par minuti. Ne pozabite pokusit ako van j dobro! Pustite poten stat jeno pol ure da pena ka se storila od mešanja posvema nestane, pa prelejte va neku lepu, čistu bocu. Dobro začepite, bocu dva-tri put obrnite i spravite svoj ajerkonjak va frižider.

Tako, to smo storili. Ja ću od ajerkonjaka storit i kolači, da ne mislite da ću se popit! A sad si gren nalet žmujić i još malo zakantat. A morda i zatancat! (Ma ovaj moj za valcer ima dve leve...)

Vita za dobar dan

Pred malo san van povedela kako ćete storit domaći friški sir, al skutu kako ga zovu va dežele. To ste već navadili pa van neću o ten jopeta špjegat. Ma ono ča morda niste zapametili, al morda niste misleli da je važno, je - da ćapate sirutku, onu vodu od sira! A zač? Zato aš je žmuj sirutke - žmuj zdravja. Blago je kiselkasta, ma ča j' važneje je to da j' va njoj sačesa ča nan za telo dela dobro. Ima B vitamini ki nan trebaju za rast, za imunitet, a bome i za spametit se ča smo čera jili i kade smo bili i za skoncentrirat se na delo, a ne na monade mislit. Va sirutke ni niš masti, cukari, pa tako ni kalorij (oneh vražjeh spodobi ča nan su robu va čas store par broji preusku, vrah jin je matere, ten kalorijan), pa ako ste na kakove dijete, bilo bi ju dobro pit saki dan, aš nan i probavu dela boju. Lih je dobra i jušto za samo ohladit se po letnje vreline. A va nju morete i sačesa speštat, i voća i povrća, pa tako dobijete jako dobre i zdrave kombinacije.

Za četire peršone će rabit:
8 deci sirutke i
nekuliko voćkic, kad jih speštate da store okol 2 deci voćne kaše.
To van moru bit marelice, praskve, banane, naranče, limuni, grejpi, kivi, ananas, črišnje, višnje, ostružnice... ma se ča najdete kako gre štajon.
Ili morete speštat i povrće - špinaču, blitvu, merlin, malo petrsina, bilo ča ča se more jako speštat va kašu.

I evo kako ćete to storit:

Kako storit domaći sir

Danas ću van povedet kako od mleka z butege morete storit fanj dobar domaći sir. Ma to se nisan navadila delat na Gromišćine, leh va Turopolju pul moje bake Milke!
Imela san neka četira leta kad san prvi put prišla va tu kuću. Onako mićišna i sramežjiva, posela san se na miću šamblicu pul vrati od kuhinje...Ma to ću van drugi put povedat.
Baka Milka j' imela štalicu, va štalice kravicu, od kravice domaće mleko, a od mleka se ča onako mića nisan ni mislela da se od mleka more delat, tako i domaći sir. Ja danas niman ni štalicu, ni kravicu, ni domaće mleko, ma iman butegu va koj moren kupit se sorti mleka i onega ča mi rabi za storit sir, skoro kakov je i bakin bil.

                                                            Za storit kilo sira rabi:

2 i pol litre mleka - friškega, al kako biše na boce - "svježe mlijeko"
3 deci običnega jogurta,
3 deci kiselega vrhnja
i 3 žlice belega octa

Zač jušto to? Zato aš su va fabrike mleko ko je imelo se va sebe posvema ogolili i to ča nan prodavaju ni ni slično onemu pravemu, pred malo pomuženemu. Zato vrnjan vrhnjo nutra zarad gustoći i masnoći, a jogurt i ocat mi rabi da se to mleko skisa, ma lih da ima lepi dih i da j'sir dobrega okusa, da ne dava na pokvareno mleko.

Od "mehanizacije" još rabi:
padela va ku stane malo više od 3 litre i pokrov za tu padelu,
jušna žlica, žica za mešat, paj od juhe,
cedilnik, još jedna padela, more bit i od plastiki, va ku će se sirutka cedit, neč za podložit cedilnik da se ne toća va sirutku,
sterilna garza, al čista krpa za črepi ku rabi prokuhat,
neč za storit pezu da se sir dobro ocedi - ja san zela pijatić i padelicu z vodun.
Ja, a šparget san skoro pozabila napisat... mona...

Kad ste to se parićali, verujte, to j' pol dela gotovega! A sad pogjedajte kako ja delan domaći sir:

Pita od pora

Danas ćemo obedvat  seljačku pitu od pora i skute.
Fanj judi san čula povedat da njin deca ne jidu rada zelenjavu, panajma takovu kot ča j' por. Moji fakini ponemeju saki put kad va butege pasan okol pora i ne zamen magar jenega. Oni bi ga jili sakako i saki dan. Najveć njin se pijaža pita od pora na ki god mod ćeš. Ovaj put njin pečen otprtu pitu al kako bi se po modernu reklo tart al po frančeskem quiche.
Pa da vidimo ča mi rabi za nas četiri jako lačneh (ma boje reć lakomeh), ako ča trebe poć dokupit (ma mislin da se iman doma):
za testo:
3 žmuji mehke muke (to bi bilo 6 deci se skupa)
2 miće žličice soli
15 deki putra
1 jaje
2-2,5 žlice vrhnja kiselega
1,5 mića žličica šode bikarbone
10 žlic mrzle vode,

a za filu:
0,5 kila pora
0,5 kila skute
20 deki hamburger pancete (al vratine, a more i dobra kobasica)
2 jaja
2,5 deci vrhnja kiselega
malo papra i soli
malo putra za pofrigat pancetu
malo petrsina, origana i par listići kuša.

Još mi rabi kalup i masna karta za kalup obložit. I to j' se. Iman okruglega, 36 centimetri širokega, jušto za ovu pitu!

I da sad tuka ne rastežen na dajo ni na širo, storila san van video-ricetu. Pa sad lepo stavite na se tarves, zasučite rukavi, na kraj stola stavite laptop al tablet al smartfon (ča već imate), takajte zvučniki, parićajte se ča van piše tu spreda na spiske i taknite oni buton ča piše play da morete skupa zmanun speć seljačku pitu od pora i skute!

Potresujka

Ča j' to čut, ča j' to čut, ča negde grmi?
Ma ni, ne, to ti se lih malićo zatreslo tle pod nogami.
I tako sakeh par dan. Al morda boje reć, sakeh par večeri. Jušto kad bin otela poć spat. Zmed jedanajste i ure po noće.
Pred jeno mesec dan, bila je jušto ta doba, jedanajst ur, najedanta se j' čulo kot zdugega zagrmet, a mane se j' se stakleno va kuće zatreslo. Oni moj je već napol spal, pa ni niš čul ni oćutil, leh je zanjurgal ča mu mira ne dan, da ča zijan po kuće. Strela ga trefila, ako on ne bi jušto tako spal i da j' celi plafon na njega hitilo. A moglo je hitit, aš je celi plafon kot babin zub. Lih čekan da mi ča na glavu pade odzgora, ma jušto se niš ni ne rabi trest. Tr je dosti da mi kamjon pasa po ceste spred kuće da j' mane nutre kot potres.
Reču da mačke oćute potres i da su jako nervozne. Ma ove moje dve su vajda klokani, a ne mačke. Ni jedan sled se nisu ganule, nisu ni oče otprle dok jih nisan vanka z kuće potirala da moren kuću zapret i poć spat.
Pred par večeri san ja već napol spala, a on je jušto z kundota zilezal.
-Šta je to? Šta se to čulo? Ti ne čuješ? - pital me j' i kot kakov šijun skočil na posteju.
-Ma ki boh ti je? Ča vapiješ, ku vražju mater? Ča ne vidiš da spin? - zanjurgala san ovput ja.
-Pa šta nisi ništa čula, ko da je negdje zagrmilo?
-Ča misliš da se j' opeta zatreslo? Tr je bil potres pred malo...
-Tako mi se čini...
-Kade mi j' mobitel?
-Šta će ti mobitel sad?
-Za videt ako j' ki ča na fejzbuke napisal. Ako j' potres bil, siguro j' neki već pital ako smo se stresli.. Ako ni niš na fejzbuke, onda ni ni bilo niš. Hoj spat. - obrnula san se na drugu stran, aš je na fezbuke već neki neč napisal, a mane je luster jušto nad glavun. - Pišku ćoravu, vajda će zustat gore...
Čera večer, sledić za polnoćun, jušto san pogasila komp i stala se da gren curat. I opeta je zdugega zabrundalo, zagrmelo, a staklo na vrateh je zazvonilo.
-Orko dio - zazijal bi moj nonić da je živ - pa ča j' onisti dole tuliko fažola jil da nas sako malo mora strest?
A morda to onaj tamo dole tanca potresujku s Puston ki mu je jušto sinoć prišal va pakal.
-Joj, ako ti ja jenu potresujku zatancan, vrah ti mater zel....! Pust' me spat!

Mesopusne monade 2014. leta

...ili kad su na Pusni utorak halubajski zvončari po Pehine zdolun šli...
Kad san pred par let prišla na Pehin bivat, va staru kuću ku je pred fanj, fanj let storil moj bišbarba kad je z Jelšan  v Reku prišal delo iskat i familju naselit, nisan ni mislela da će febraj i marač bit tako munjeni kot su. Komać par meseci kašneje, kad me j' ćapal prvi febraj va te naše starine, san zasprave tendila ča j' to peto godišnje doba. Trefilo me jušto to da mi j' prvi sused s ken kuću delin i moj rod Đelo i sam do pred malo bil del sega tega šušura i munjesanja - bil je halubajski zvončar. Puneh dvajset i pet let je zvonac nosil. Ma kad je masku znel i zvonac spustil, sejno ni finil nemotarije delat, aš sako leto na Pusni utorak, kad halubajci svoji zadnji ophodi delaju, frmaju se pul njega ča popit, pojist, curat ki rabi i malo zraka zet da se more naprvo poć. Tako saki Pusni utorak na toj našoj štacije jušto zmed Marinić i Pehina onega dole niže, pul škole, okol polna j' z brega, od Marinić, čut prvi zvonci. Ki ta čas će bit tu. I zasprave j' tako. Cela kolona muškeh obučenih va ofčje kože, z grdun maskun na glave, kampana va složnen koraku. Puna cesta jih je! Od miće dečice do oneh ki su morda i pred penziju, si z jednakun vojun zvonac nose. I medved šnjimi, i soldati, i oni črni vrag, vrag mu je matere...! I ča me ni jušto on ćapal!
I ča bi Đelo rekal - raja umret leh da se pul nas ne frmaju - da bi i hletu!
A ovo leto je bilo ovako:

I na samen kraje, i moj Aladdin je dočekal zvončari, med kemi je i nekuliko njegove školske kumpanije.

O mlikarici

Gluho j' doba noći, okol tri ure je. Si još spu i slatko sanju, a ja se moran stat. A rada bin još malo pospala, kušin je mehak, posteja tepla... Na, ča ćeš... Na se stavjan fris, kotulu, berhan, tarves... Okol hrta ogrnjan vuneni šijal. Mrzlo je, trebe oganj snetit. Hmalu se z ognjišća čuje kako plamik tanca. Livan frišku vodu va kotlić da se stepli na ognjišću. Leh da skuhan bilo kafe za dicu, za južinu kad se stanu. Majkica će potla palentu konpiricu skuhat. 
Ziman jenu trišćicu z ognja za važgat feralić na petroju. Moran poć va štalu, kravu pomust. Škuro j' vane kot va rake. Moja kravica već zna da njoj dohajan kot i sako jutro. Malopomalo natekal j' pun sić teplega bilega mlika. Bit će za čagod zaslužit. A onput nazad va kuću. Mliko ću va late prelit. Dil mlika ću spravit va stran, za škorup tepat i sir delat. Parićujen sir kega san čera storila. I putar... Spravjan se va plašćenicu, za oprtit. 

Va debeleh kopicah i postoleh na nogah, z facolon na glave, z feralićon va jene i velun latun va druge ruke, z teškun plašćenicun na pleći, gren vanka, va škurinu. 
Tako oprćena zapiran vrata i obrnjan se naprvo, kot i sagdan. Leh tamo na pute sviti feral od susede Vidice. I mića Marica j' šnjun, oprćena z košićon drv. A brižan otrok, za videt je da njoj se još spi... Divojčica j' to od komać deset let. Spametin se da san i ja jušto tako, va teh leti prvi put košić oprtila i skupa z materun i mlikaricami šla zdolun. Teško j' bilo to brime, ma moralo se j' poć matere pomoć. Majkica se j' neboga razbolela od tulikeh leti zdolun i zgorun oprćena hodit, trudna j' bila od sega. 
A onput, par let za ten... kad je mat moja rodila najmlajega brata, nesla je na Ričinu košaru robe zipirat. Ni njoj bil ki napomoć. Suseda nju j' našla ležat kraj vodi, kraj košare, mrtvu... Odonda j' se na mane zustalo i na mlajoj sestrice. Ja san plašćenicu materinu oprtila, a sestrica moj košić. Puno puti mi mat moja pokojna va sanje dojde, pak mi se osmehuje i po laseh me miluje aš zna kuliko san se natrudila sestre i braću prihranit i zgojit, va škole jih otpravit, poženit. Jenega j' brata barba, ki j' plovan va našoj crekve, zel za popa ziučit. Najmlaja j' sestrica potla za koludricu šla. Ostali smo nas pet va kuće, z ocon i starun majkicun, ma majkičine noge nisu više mogle tuliko brime zdolun, v Riku nosit. I otac je vaje za materun šal.

Ni to živjenje lahko, ma jušto uža bit i fanj veselo. Tako će, bireć, i danaska bit, aš je čera va Ifkinen sele lipi kažin bil! Čera j' Pepić h Tonice prišal potajno ofirat, ma njh je njeja majkica ćapala da se va sene bušuju...zajeno ga je, na su forcu zijajuć, pu plovana spovede potirala, kistemu je do pred par let otpivač bil! Ki zna ča mu je onisti rekal. Ma ćemo i to doznat, ni Gromišćina tuliko vela! Brižna j' Tonica potla na Ričinu šla z košarun lancuni, a za njun njurgajuć stara majkica, za stražu držat. Se ćemo sad čut aš pred nami j' Rebra, a Jelka, Ifka i Nada jušto prihajaju od svojga sela. Grd je i strman put po Rebri, pa ga j' lagje pasat ćakulajuć i na smeh obrnjujuć z kumpanijun.

I tako ćakula na ćakulu, zdanilo se j', a pred nami su Banska vrata. Tu ćemo se razdilit. Ifka, Vidica i mića Marica gredu zgorun na Trsat prodavat, a Nada, Jelka i ja gremo zdolun naprvo, v Riku. Pred nami, a i zada nas, pomalo hode i druge mlikarice, va kumpanije po par od njih, kako s ke strani Gromišćine. Doli, va grade ćemo trefit Halubajke, ča od Klane i Studene, Marčeji i Svetega Mateja mliko donašaju. Ma halubajske mlikarice većma po Kastve i Volosken obahajaju, njin je ta stran naredneja.

Skudagod smo i kamogod gremo, sako jutro friško mliko nosimo, po kućah gospockeh obahajamo. Si poznaju nas mlikarice.

"Gospa, zamite friškega mlika!"

Oprćene, pogrbjene pod tešken brimenon. Po vrelen sunce, po dažju al snegu, po teplemu, po mrzlemu, škinu prigibjemo noseć mliko, tu bilu Božju kapju ča j' nan decu othranila, i našu i gracku, i va život jih otpravila.

Kafe

Ča j' to va ten kafu da ga smiron pijemo?
Opreš oče rano jutro, kot pijana se po kuće motaš dok ne popiješ prvo kafe. Pa greš na delo ako si te sreće da još negder delaš i prvo delo ko je za obavit je - popit kafe. Pa ti dojde vreme za marendu, a ti po žepeh išćeš munidu za kafe z onega aparata, va kantune pul kundota na kraj šalice. To ti j' kraj kundota zato da zajno greš odbavit i ono drugo na ča te to kafe potira. Aš za drugo ni. Ma zove se kafe, pa ga samo zato i piješ. Potla ti pride kakov poslovni partner, pa ala daj, popiješ još jeno kafe za kumpaniju. Onda greš doma na obed, i čin progutaš zadnji pirun jila, još se ni otrla nisi, već pitaš
-Ča ćemo sad kafe, al malo kašneje?
Ako j' to kašneje, komać ga dočekaš. Pol ure za ten, neki ti zvoni na vrata. Suseda. Al mat. Al sekrva. I se posede jušto na tvoje mesto, parićana za ćakulu (a tista usta ne ume zapret) i već pogjedeva po kuće za videt ako j kafe gotovo. A vlih si ga popila! I sad moraš opeta š njun, aš ako ne daš, povedat će okole da nisi otela š njun ni kafe popit... A još bi otela i kakov keksić da njoj kafe ne pade teško va štumik, da njoj kiselinu ne stori... Najboje da njoj zajno i šodu parićaš. Za ne-daj-boh žgaravice. Aš će ionako ki ta čas o boli počet napovedat. I tako uru vrimena. Morda i više.

A serija ti na televizje jušto počinje, a ona se još ganula ni s tvojga mesta. I nervoz te već ćapeva, ma ni siguro je od te lajave babe, al od tulikega kafa.
Fala Bogu dragemu i Majke Božje i sen sveten, rekla j da mora doma poć aš da j već posema škuro, i da će njoj Pepić zijat da kade boga je do te dobe aš je lačan i ne zna ča bi za večeru! Ja, ma sad i serija jušto finjeva i nisi videla ako j Hurem kega potrovala, ni ča je Zumbul-aga onoj kaške rekal, a ni onega lepega tića Bali-begića nisi arivala pošpijat...
-Drugi put reš ti vrata otpirat! I reči da me ni i da san šla na kafe! - zazijaš onemu svojmu ča se smeje aš konačno je mogal fuzbal gjedat namesto onistega Turka... I partiš posvema jadna va kuhinju črepi pomit da ne zustanu za jutra. I to još na ruke moraš pomivat, aš još nimaš onu makinu za črepi kot saka moderna ženska ka ovu dobu ima nogi zdignjene na kauč i gjeda televizju. I to pronjurgaš onako kot za sebe, ma opeta jušto kuliko rabi na glas da te on čuje, da ne pozabi, telac jedan. Mogal je i on to storit...
Tako. Pomila si, letriku pogasila va kuhinje i greš sest na kauč, kad va ti čas on pita, onako se z upitnikimi okol glavine
-A ča mi nećemo niš danas večerat? Ma ja san sejno nekako lačan...
I zajno ti se si bogi i se zvezde kuliko jih je na nebe i meseci i cela rodbina skupa š njimi, najdu na vrh zajika dok kramaš z vratimi od kupatila.
-Hod si sam storit! Hod mater ženit! Tr ti j storila dve ruki, nisi pobogu invalid da ne moreš ni večeru sam zet!
-Ti si zasprave ponemela! San ti lepo rekal, ne pij tuliko kafa, aš ti nervoz dela! Sad nećeš celu noć spat!

Kad štriga zustane va iste kamare kade je i televizja...

Ma pravo ću ti reć, jušto mi se danas ni otelo poć dole va moj kantun delat ti vrajži pedeve. Pa san zustala gore. Na stole va kuhinje san se karte rastegnula, važgala kompić, i ... a san, tu i tamo san ča i delala, ni da nisan... A televizja je važgana cel božji dan. Malo je Jube sedel pred njun, pa malo deca, pa je malo sama za se delala, pa san i ja malo hitila oko...
Najprvo je Ivica skijal slalom. Ja san jušto tu dobu kafe parićevala, ono prvo, do obeda. Ive je šal peti zdolun, ma ja baš i nisan jako abadala. Jušto san vase mislela kega klinca taj Ive više dela monade od sebe na temi skijami, tr već fanj vremena j' za videt da ni to više to, ni više onaj pravi. I da bi se zasprave trebal pustit tega i dat kemu mlajemu mesta... Ma znaš ča... nisan ni finila to mislet, kad je Jube onako znervirano zazijal tamo s kauča (on ti ne govori po domaći, magar se razume ča povedamo):
-Uh! Ode! Pa jebate, vidi ga, ipak ide do kraja!
-Ča se to vrnul nazada? - obrnula san se videt ča je.
-Al nema šaaanse da uopće uđe u drugu...
-A ča ja govorin celo vreme?! Ni to više za njega!
-Pa da, šta on forsira, meni zbilja nije jasno... I taj stari njegov... ma ako je on idiot, al jebate, nakon toliko operacija nema on šta više tu tražit.
-A gre Natko danas? Ki broj on ima?
-Ma neki visoki, teško će se probit, al ko zna, vidiš kako je jučer super uspio.
-Na ti cukar... makni to va stran da kafe stavin...
I tako mi pijemo to kafe i gjedamo skijanje. Sad već ni tuliki gušt, ma sejno, mane j' gušt samo ti sneg videt... Kad je šal Beni Raich zdolun, isto san rekla da bi i on mogal komotno finit to delo, a bome i Ted Ligety je šal fuć.
-Zač se Ivica opće zajebava više z ten? Ča ni mogal kot sestra mu, lepo dok je bil na vrhe, finit i cel svet bi ga zapametil kot jenega odličnega skijaša? Ovako, samo će poć se niže, još malo pa će se judi počet smet ž njega aš ne ume finit kad je vreme... i njih par isto tako. Tr je dece i mladeh...

Tako j' pasalo dopolne, skuhala san obed za prsti polizat, pojili smo i potla šli saki na svoju stran. Jube j' šal z kumpanijun na kafe, roker je šal čitat lektiru, zvrk pod tuš, a ja san se opeta pedeveja ćapala... Na stole va kuhinje. A televizja j' delala i delala.
Neku dobu hvečeri (opće nisan znala ka ura je, magar mi piše na kompiću) doletel je Jube na vrata vas zapuhan
-Jel počelo?
-Ča j' počelo? Kade?
-Pa rukomet! Zato sam i jurio doma!
-Bo! Mane j' Kockica važgana aš je bil onaj crtani, on frančeski, o telu...
-Jebli te Francuzi, protiv njih i igramo... - i zima daljinski v ruku za obrnut program, pa se šal zut i sprotu curat.
-Na, jušto ti počinje, himnu sviraju! - zijan ja za njin.
-Jel ima šta za večerat?
-Od obeda j' malo tamo na špargetu, ako ćeš si steplit...
-Ma ne da mi se to - i otpira frižider - paštetu ću si namazat.
I tako j' počela utakmica. Ja san delala svoje delo, ma sejno gluha nisan. Malo po malo me j' počel nervoz ćapevat, a oko bi sako tuliko pobeglo prama one vrajže televizje. Samo san trdo mučala i zajik grizla da Jube ne opazi. Da me pasa nervoz, odigrala san dve-tri runde karti na kompiću. Bome san i celu jenu cikuladu pojila. I tako j' finilo prvo poluvreme. Jušto da čovek gre curat, ča popit, ćapat zraka vane pred vrateh - oni gnjusni daž opeta pada! Pa to j' za ponemet!
I evo ti već drugo poluvreme. I ča reć? Naši ko da dve leve imaju, muče se oko oneh Frančezi, suci se malo delaju bedasti... i to je to. Dobro, ala, protu kraja su se malo refali, lih da bi bilo gol zabit i zjednačit, ma j' vranić i tu loptu zel... Zafikal je kraj, a naši su zgubili dva razlike. Jube ni niš govoril, ma j' sejno nekako grdo pogjedeval prama mane. Ja san glavu prignula va karte i storila fintu da san va veleeeeen delu. A cel svet zna da ja ne smen tu bit. Va iste prostorije kade se kakova utakmica gjeda. Va iste kuće kade se kakova utakmica gjeda. Ma ni čut ne smen da j' opće kakova utakmica! Aš onda to ni dobro. Aš se zaštrigan. A ako već moran bit tu, ni pod razno ne smen za naši navijat. Leh za oni drugi, da njih zaštrigan, pa da oni zgube. Ja, navijala bin ja morda za Frančezi, ma baš nisan otela aš mi oni karonja od Karabatića baš niš ni simpatičan. Fulirant obični. Balkanac kako god obrneš. Glumac. Vrah ga zel! Da ni on igral, morda bin i navijala za Frančezi, aš je prvo bil Taxi na televizje, pa san se lepo nasmela - Frančezi delaju jako dobri filmi. Pa su mi onda si Frančezi smešni i simpatični. Leh ako nisu Frančezi... Ja, ni danas bil neki dobar dan za naši sportaši, a još je i dažjeno.
Ma gren ja taj pedeve finit... Na, i opeta j' nekakov frančeski film na televizje!

Kapuz kiseli z domaćemi kumbasici i vinon, z peknjice

Prišal je h Matujan voz kapuza,

voz kapuza kiselega 

Joj, joj, joj konpir i fažol 

slana riba i palenta - to je se dobro!

Za 4 peršone van rabi:

Pol kila kiselega kapuza 

4 pari kumbasic 

4 česni česna 

1 žlica dobre prašće masti 

par listi javorike  

popar va zrne 

žmuj (1,5 dl) belega vina (kastafske Belice) 

po voje soli al malo Vegete (ne preveć, aš su i kapuz i kumbasice slani)

Steplite peknjicu na 220°C.

Široku suru (bi bilo boje ako je zemjana, ma i saka druga će bit dobra) pomažite z mastun. Na to rastresite kiseli kapuz, sakuda jednako.

Česan olupite i prerežite napol, pa zarivajte va kapuz na par mesti. Hitite i par zrni popra i par opraneh listi javorike.

Odzgor kapuza stavite dobre domaće kumbasice, po dugen zrežene napol.

Se skupa zalejte z belen vinon.

Pokrijte z aluminijskun foljun, na ke štikadenton prošupite par škujic da more sapa hodit vanka. Pečite jeno pol ure, pa znamite folju i pečite još kvarat ure, al malićo manje, da se odzgor lepo zapeče.

Obed po domaću je parićan. Hten skuhajte palentu, običnu al konpiricu, a morete za gušt odzgor zribat i trdega ovčega sira. I ne pozabite na žmuj vina da jilo lagje gre zdolun!

A potla obeda, nemojte zajeno zaspat, morete malo i zatancat da se one prokjete štrige od kalorij preveć ne ćapaju!

Homo frigat fritule!

Te miće, slatke balice si rada pojimo!
Fanj let nazad, ovi današnji kolači se nisu užali delat za sagdan, a i nekako su se delali najveć po grade, ne po seleh. Ma fritulice, al ulenjaki kako jih još tu pul nas zovu, bile su slatko i za sagdan i za blagdan i va grade i po seleh. Mepar, da ni ženske ka ih ne ume storit,  ni domaće, a ni prišlice. A moru se storit na fanj modi, more se va njih sačesa nadrobit. Ma mane su najboje po oven ricete:

• 40 deki muke
• 1 jušna žlica pecilnega praha
• 10 deki cukara
• 1 mića žličica soli
• 1 lemuncin
• 2 deci jogurta
• 35 deki jabuk
• 3 jaja
• pol deca rakije

Htemu van još rabi uje za friganje i cukar va prahu za dobro posipat po fritulah. Ako volite, va testo morete zmešat i malo cizib.

Va muku zmešajte pecilni prah i sol. Zribajte i ocedite lemuncin, pa to zmešajte z jogurton i rakijun. Ostržite i zribajte jabuki.

Jaja dobro stucite s cukaron. Va to zmešajte zribane jabuki i jogurt rakijun i lemuncinon. Po malo nutra mešajte i muku. Gotovo testo bi trebe bit lepo glatko, ne preveć trdo, da se more lepo z manjun žlicun znimat i stavjat va vrelo uje. Frigajte jih do lepega zlatnega kolora, pa jih onda znamite vanka na kakovu krpu (nemojte onu blatnu od črepi, leh čistu!) da se uje ocedi, pa komać onda stavite va terinicu ili na pijat i posipajte fanj cukara va prahe po njimi.

Najboje za jist su još mjačne i vele kot malo veći oreh.

Još sličic:

Kroniki od Pusta - Antonja na Kvarnere

Od čera, od Antonje 17. jenara, pu nas na Kvarnere j' počelo, kako to užaju reć - peto godišnje doba. Doba od nemotariji, huncutariji i sekakoveh monadi. Doba od maškar. Pusno doba. No, ako ćemo jušto, počelo je još na Tri Kraji, ma čera, kad je zatulil rog, i zadnje selo kisto još ni ćapalo virus od munjesanja, i službeno j' "palo".
Ovega leta Antonja j' bila kot da se j' nebo zemjun sestavilo. Daž je kot s kabla leval cel božji dan. Jušto dan za niš. Pak san se spametila, kad san po sen ten dažju, hvečeri, po ceste čula mužiku od maškar, ča gredu zgorun va Sveti Matej Pusta obesit na pal, kako j' to bilo leta 2011. kad san još na Trampoven Brege bivala... no čujte, ću van povedet!

...Na mojen šufite čula se mužika od seh stran – zdola mane tulili su i sopli su Zamećani, na leve Pehinari, na desne Kastafci, a zada mane Halubajci... Tulilo je i soplo i po Kvarnere od Crikvenice i Bribira preko Krasice i Hreljina, i po Liburnije - po Matujah, Opatije, Lovrane...
Čera, na Antonju, sen je načelnikon i gradonačelnikon zaškurilo pred očimi aš su morali abdicirat, pustit svoje mehke foteji va ken se rit lepo ćuti, i predat kjuči od mesta maškarsken vlastodršcen. Tako j' bilo i pul nas na svetomatejsken Brege, kot i sako leto. Ma ov put, za pravo čudo Božje, ni dažjilo! Meštar Pinel je dobil kjuči. Proglasili su ki j' kriv za se grdo ča nas je našlo pasanega leta - Pust, zna se! Pa su ga neboga, obesili na pal. I tako će bit obešen skrozi do osmega marača... Zajeno se j', kot i va sake revolucije, poništilo se regule od stareh vlasti i proglasilo svoje. A one van, dragi moji, ovako gredu:

DELAT SE NE SME, SKRBET NIŠ, POJIDAT SE NIKAKO, JADIT SE – ZABRANJENO. MORA SE: LUMPAT, POHAJAT, TANCAT, ZABAVJAT I LIH MISLET KAKO ČIN VEĆU BEDASTOĆU ZAKUHAT I DOBRO SE ZABAVIT.

A bogme, ni ni ten noven vlastodršcen hudo - meštar od maškar mora nagjedat se nemotarije i cel taj šušur, mora pit i jist kuliko god mu va drobac stane, pa i malo više (kot i dosadajni načelniki), mora tancat i hopsat, a brižan, mora i sako leto novu, mladu, šesnu Krajicu kuntentu držat! Jušto čera večer na prvemu ovoletnjemu maškaranemu tancu zibrana mu je nova Krajica, mepar je i on kuntent... Magari, mane se ovako od ženskega kantuna čini da se j' kot i fanj muškeh jušto zvicijal i zobjesil, pak se brzo štufa sake ženske. Ma mlad je još, šesan i zdržjiv ti naš meštar Pinel, pak mu morda i ni za zamerit, aš mu se tuliko mladeh i lepeh divojki nudi za Krajicu. A on mora najboju zibrat... Tr i sami znate kako to inače gre va krajevskeh familijah - ćeš-nećeš, pulitika zgora sega! Magar je to i ovista nema, pusna pulitika!

Da ne bite misleli da je samo pul nas tako, ni. I sa okolna mesta, od Gromišćine do Učki, su obesila svojga Pusta na pali, al na najveće drevo va sele. Va Kastve, ki nan je prvi sused, zibrana je i cela vlada z ministri, od keh je najvažneji ministar od financij Giovani Šteker, aš je fanj soldi zustalo od pasane turističke sezoni. Pa tako Kastafci od čera moru računat i na veći pržun s pogjedon na austrijski Alpi. Kastav je brez javnega natječaja (a to van je va zadnje vreme jako moderno) dobil i skijašku stazu Gemišt Partenkirhen, aš se pokazalo da se i pul nas va primorje more jako dobro skijat kad se pozabi cesti od velega snega očistit. Po navade se deli i nagrada Zlatna Broskva za najboje od pusneh nemotariji ki su bili pasanega Pusta.
Va matujsken kraje j' živo i veselo još od kad su žejanski zvončari jušto ob polnoće na Tri Kraji zakampanali z svojmi zvonci za fin od božićneh blagdani i početak pusnega kravala i na pal obesili svojga Hansa. Dan kašneje su i Munjci pomunjesali, a poten se j' i Gromišćina zatresla od Dondolaši.
Ja, dosti san tega tu besedila, kantala i tancala, vreme j' od obeda pa da i ja dobrega ča pojin! A ča će se va oveh sedan i pol šetemani jist i pit, lepo će se videt pu Matuj na festivale pusne hrani. Ja van moren malo gušta dat, lih da van slini poteču:
pašta al palenta ze slanimi srdelicami,
domaće kumbasice z kapuzon i palentun,
palenta kompirica,
jota z pancetun,
repa z fažolon,
domaći zapešt,
seh sorti fritul i kroštul,
presnac, supice, baškoti
i još čuda, čuda tega!
Tako, ja san van za danas svoje napovedala, a sad gren pijat joti pojist i žmuj naše Belice popit! 

...ja, tako van je to bilo prej dva... no, čuj mane bedaste... prej tri leta jušto na ovi isti dan. Danas je bičić drugače, Halubajci su, po modernu, zibrali meštricu od karnevala. Aj, ma ča bin volela bit na njejen meste kad bu kraja zbirala! Ma, moran mu reć neka se dobro pazi, aš bi reć da je meštrica sa vrajža, da ne bi finil kot i ovoletni Pust... Za onu stvar su ga obesili na pal! Enti jarca, tako ti je to kad ženske zamu vlast va svoje ruki! Zajeno moran jenu fritulicu v usta hitit, da me grč pasa!

Stojte mi dobri i veseli, munjeni i nemi kot i saka prava maškara, aš počel je Pust – ŽIVIO PUST!